Te ainda Sindicato di Polis (SPA) no a haya contesta riba nan carta manda pa Gobierno tres siman pasa encuanto e medidanan cu ta bay tuma pa baha gasto. Esey tabata motibo di e reunion urgente awe den oranan di atardi.
Jose Dirksz, Presidente di SPA, a splica cu den prensa a lesa cu Minister Presidente a bisa cu ta bay kita 5% di e Bezoldiging di e ambtenaarnan, mientras cu den e carta SPA a pidi pa no mishi cu nan salario pasobra e ta bay tin efecto den nan rango, den pensioen y AZV. A scucha cu ta bay cuminsa cu 5% y lo por bira mas, of kita 1500 ambtenaar. Polisnan ta masha rabia, pasobra mester haci un estudio pa por eherce e profesion. “Niun hende a drenta Cuerpo Policial pa motibo di un fabor of otro. Unda cu practicamente tin weso, kier corta vet. Nos no ta acepta cu ta bay corta 5% di bezoldiging. Nos ta bay hiba Gobierno Corte unabes cu nos haya esaki por escrito.”
E miembronan di SPA a drenta un fase di conflicto cu Gobierno. Y no por garantisa siguridad di pueblo. P’esey ta pidi pueblo comprension, pasobra mester corta unda cu tin vet pero no unda cu no tin vet. E structura di salario ta den e inrichtingplan, firma door di Gobernador. Pa cambia esaki mester bay Parlamento. E ta puntra si e tres Polisnan den Parlamento ta dispuesto pa corta den e bezoldiging di Cuerpo Policial. “Nos a pidi Gobierno pa respeta esey. Niun momento nos a bisa Gobierno cu nos no kier entrega. Pero no di nan salario. Nan ta conseha pa mira den direccion di e 1500 ambtenaarnan di mas cu tin.
Pa loke ta e indexering ta algo cu tur e sindicatonan mester bay lucha p’e, cu ta algo cu ta bini ora cu tin inflacion. Pa aworaki nan preocupacion principal ta pa no mishi cu nan bezoldiging.
