Sindicato di Polis (SPA) ta considera aña 2020 como uno hopi “hectic” pa polis, unda cu nan tabata pasando di un bataya pa otro. “Pero nos ta sigui cu e lucha,” Jose Dirksz, Presidente di SPA a bisa. E ta corda cu a habri aña cu nan lucha pa indexering. Esaki tabata necesario y algo palabra pasobra Aruba a conoce dos aña cu inflacion di 8.0%.
Pa esaki a trata di sinta na mesa cu gobierno. “Lamentablemente tur cos a keda na mesa, pasobra nada no a pasa. Pa colmo de los colmos, Aruba a haya su mes cu e pandemia unda cu polisnan mester a draai 24 ora pa dia, trahando Toque De Queda, varios polis contagia cu COVID cu na nan turno a contagia nan famia tambe.”
Loke nan a constata cu a pesar cu nan ta frontliners, nan no a haya “calamiteits-toelage” manera nan coleganan di Corsou a haya. Gobierno a priminti cu ta bay haya “frontliners-toelage”, pero atrobe el a keda na promesa. SPA lo sigui cu e lucha y un dia lo logra algo, Dirksz a bisa.
Hustamente den e aña dificl di 2020, gobierno a bini cu un versoberingswet den cual ta permiti nan corta den salario manera “nan haya ta bon”. Despues di reunion urgente a manda carta na Parlamento. Pero mayoria a aproba e ley cu tur consecuencia cu esaki ta trece cu ne.
Si haci un comparacion of evaluacion, a constata cu na Corsou no ta mishi cu salario di polis. Aruba ta e unico isla den Reino cu a mishi cu salario di polis y nan tin miedo cu nan lo por hacie atrobe. “A pesar di esey nos ta sigui haci nos trabou. Pero sindicato lo sigui defende posicion huridico di su miembronan.”
El a bisa cu a duna gobierno te cu diabierna pa contesta nan riba e compensacion y no a tende nada. Lo bay yama miembronan pa mira cual lo ta e siguiente paso. Asina mes, den e pandemia aki, ta polis mester interveni na barnan cu no ta cumpli cu reglanan.
Un biaha mas el a bisa cu nan ta contra di legalisacion di marihuana. Esaki pasobra dia pa dia e problemanan social ta bira mas grandi. Nan ta bay asistencia por ehempel unda yiu kier “rape” un mama, hustamente door di e uzo di marihuana. “Humamento di marihuana ta causa schizofrenia. E no ta cura cancer, pasobra Bob Marley a muri di cancer. Bo ta bay legalisa un adiccion djis pa hala pia. Pakico no uza voltaren e ora,” e ta puntra.
E situacion na Aruba ta serio, e sindicalista a señala. E ta corda cu SIMAR a yega di señala cu 83% di e poblacion no tin middelbaar school. Nan ta kere djis loke hende bisa nan y ta kere tur e cuentanan aki. “Si permiti marihuana, e lo trece mas problema social.”
Na final el a pidi comprension pa trabou di polis den e dianan di fiesta, mirando cu ainda ta den pandemia. Nan ta encarga cu orden publico y mester sigui e regla y leynan.