Diadomingo marduga banda di 5:00am a drenta informacion cu un auto a drenta un cura di un cas na De La Sallestraat. Polis a bay pura na e sitio pasobra esunnan envolvi ta purba huy for di e luga. Na yegada di Polis ya e hendenan den e auto a bandona e sitio di accidente cu e auto. Habitantenan a splica cu ta trata di un auto marca Toyota modelo F.J. Cruiser color shinishi numera A-52451. E number plachi chikito di control a keda atras.
Ora cu Polis a bay chek di kende e auto ta, a resulta cu e auto ta registra riba famia di inicial O. biba den Nayostraat. Esunnan den e auto despues di e impacto a keda insisti pa bandona e sitio, locual finalmente a logra tambe. A bay mesun direccion cu a bin.
E auto modelo F.J. Cruiser A-52451 tabata biniendo for di Solito direccion Kamerling Onnestraat. Ni marca di brake tabatin na e sitio, pues tur cos ta mustra cu e chauffeur tabata bin cu velocidad halto, a pasa e T-Weg bay sin para mes y a bay pega masha duro den e cura di cas. A basha tur cos manda paden. Asina mes a logra pusha y reverse pa bandona e sitio.
Atras a keda boter di juice grandi pa mix alcohol y glas cu tabatin holor di alcohol aden ainda. Polis a confisca e plachi number chikito como prueba y tuma tambe tur e informacion necesario na e sitio. Lo keda pendiente pa polisnan di e Departamento Di Trafico pa sigui atende e caso y bishita e cas den Nayostraat pa saca afo kico a pasa cu a hit and run.
Awendia cu cambionan di ley, loke nos ta yama “hit and run” ta castigabel. Ora bo ta envolvi den un accidente, ley ta stipula cu bo mester keda warda polis of e compania di seguro pa bin regla e asunto. Pero den casi tur caso asina, ora chauffeurnan “hit and run” mayoria biaha ta pasobra esun tras di stuur ta bebi y kier purba huy pa evita cu ta gar’e. Pero den e caso aki a laga evidencia atras, cu ta indica tambe cu mayoria crimen nunca ta ‘perfecto’.
