Awe madruga, net algun minuut despues di 12:00am a sosode un accidente na e rotonde di Ponton, net prome cu Wing Hung Bar & Restaurant. Un auto marca Toyota modelo Rav-4 biniendo di Noord a subi e rotonde pero na dado momento un Toyota Corolla for di su banda robez a bin cu velocidad halto subi rotonde y dal den e Rav y bent’e un bon pida mas leu despues di e acera. Diferente piesa di e auto a spart meternan leu.
E Toyota Corolla mes a sigui bay, subi acera y bay dal den un cura di cas. Tur dos chauffeur a sali for di nan auto, pero esun di e Rav-4 a resulta illeso, mientras cu e chauffeur di e Corolla tabatin corta na cabes. E tabata sinta abou riba caminda y tabata mustra poco cansa.
Ambulance a presenta pa atende cu e herido na e sitio mes. E daño material ta grandi. Ningun di e dos autonan por a core riba nan propio forsa despues di e accidente, pa cual takelwagen mester a asisti den e proceso pa hiba nan un garashi pa drecha.
