Ayera diadomingo despues di detencion di e sospechoso cu a haci intento pa viola un turista, mesora a deten’e y a hib’e ward’i polis pa eynan interog’e mesora. Den oranan di anochi, e polisnan cu a detene e sospechoso Dion Croes, a trece warda di polis di Oranjestad, unda e oficina principal di Jeugd en Zeden Politie ta. Recherchenan specialisa den investiga casonan di violacion sexual a scucha e version di e sospechoso, despues cu e turista a keh’e.
E victima a declara cu e mester a lucha cu e trahado di watersport na beach pa evita un violacion. Un investigacion na e sitio, papiando cu testigonan a hiba polis mesora na e sospechoso cu supuestamente lo a comete e acto aki. Pero, e trahado maniac a huy prome cu polis a yega.
Consecuentemente polisnan a investiga unda e ta biba y no a dura mucho cu un patruya a yega su cas situa na Cunucu Abou pa atende cu ne. A deten’e mesora dilanti su port’i cas. A hib’e oficina di Strand Politie unda a interog’e pa prome bes. Djey a hib’e Warda di Polis di Playa caminda e recherche di Jeugd en Zeden Politie a interog’e atrobe.
Di eynan a hib’e bek na e ward’i polis corespondiente pa e pasa su anochi den cel. Hecho ta cu no tin cel mas na Oranjestad, cu ta haci cu tur sospechoso ta bay cera sea na e ward’i polis di Santa Cruz of esun na Noord.
Si ta berdad tur loke e turistanan a pasa aden of a conta autoridad, esey kiermen cu e figura aki ta un peliger pa comunidad y tambe pa nos turismo. E no por traha den zona turistico mirando su intencionnan menos bon!
