Abogado mr Chris Lejuez a splica cu tabatin sospecho adelanta riba esun responsabel pa e 300 kilo di droga haya den container cu mester a bay Europa. Tabatin mas cu un yamada telefonico, unda cu un persona ta bisa, mencionando nomber di e sospechoso, cu e ta envolvi den manda droga den hero bieu, den container pa Hulanda. E containernan aki ta bay via Belgica, pero e destino final di e droga ta Hulanda.
Autoridad a haci nan investigacion, pero a resulta cu e investigacion pa un of otro motibo no a logra determina con e droga a drenta den e container.
Esey tabata un punto cu abogado Lejuez ta bisa cu ta un misterio, pasobra ningun forma por a logra demostra cu e persona aki of un otro persona, a sconde e droga den e container.
Erornan
Abogado Lejuez no por bisa unda e erornan a tuma luga. Sigur ta cu tin varios punto cu posiblemente e investigacion por a bay mas miho. Entre otro e videonan cu nan no por a produci dado momento. Entre otro e seyonan riba e container cu no a wordo controla si nan tabata bon ainda, si nan a wordo kibra of a wordo manipula. Tin varios punto asina den e investigacion cu no a haya resultado pakico e tabata asina. Tin varios punto den e investigacion cu a causa cu na final di dia no tabata tin prueba contra di e persona.
Sentencia
E cliente semper a para riba cu e no ta envolvi den e acto aki y finalmente a logra su libertad tambe. Mester bisa cu ora un persona cu no ta di Aruba wordo laga den libertad di prison, ora cu e sali for di KIA, nan ta pon’e den man di Warda nos Costa, mescos a pasa cu e persona aki. El a bay den man di Warda nos Costa y Warda nos Costa ta percura pa e bay di Aruba. Tin entendi, pasobra Warda nos Costa ta duna chens pa paga e ticket of atende e biahe pa bay den exterior, sino nan ta deportabo. Den e caso aki tin entendi cu e persona aki mes a percura pa transporte pa e por a bay den exterior.
E trabao di e cliente
Por a mustra hues cu e persona aki no tabata un persona cu no tabata tin modo. E tin dos cas na Venezuela cu el a bende cu e tabata tin placa. E tabata tin un compania na Venezuela cu tabata produci placa p’e tambe. No ta trata aki di un hende cu no tabata tin placa y tabata hinca exclusivamente den droga. El a para semper cu e no ta den droga y tabata tin modo di biba pafo di droga.
E persona aki ya pa tres of cuater biaha cu e tabata manda container den exterior. Den e otro ocasionnan no a drenta sospecho cu algo a bay robes. Ta te despues a drenta informacion anonimo via tiplijn di polis, cu tin persona a yama bisa cu e persona aki ta envolvi den esey. For di eynan polis a haya sospecho cu nan a cuminsa haci investigacion. A tap tambe, cual a bin combersacion over di hero bieu, cu personanan di barco di e agencia di barco cu e douaneronan, etc. Pero solamente cada biaha riba hero bieu. Hopi biaha ora hende papia di droga, nan ta papia den codigo y esey no tabata tin den e caso aki. Tabata tin gewoon combersacion di e containernan, con nan ta bay, ken ta paga pa nan, etc.
