Pueblo merece y tin derecho di wordo informa dor di Minister di Infrastructura riba otorgamento di terenonan protegi, na amigonan di gobierno. Lider di fraccion di AVP, sr Marlon Sneek a mustra den conferencia di prensa cu ta trata aki di terenonan cu semper tabata proteha, cu ningun hende no por a haya pa desaroya ni hotel, ni cas pues net nada. Awo ta bin resulta cu a duna mil meter cuadra na un persona a yega na un Minister di Gabinete Wever Croes.
“Minister di Infrastructura mester bin dilanti y duna informacion y aclaracion riba e asunto di otorgamento di tereno considera sectornan protegi y cu a otorga awor na un ‘campaign manager’ di Minister Dangui Oduber,” esaki Parlamentario Marlon Sneek a trece dilanti den conferencia di prensa di e partido berde.
E fraccion di AVP den Parlamento kier sa for di Minister di Infrastructura for di ki dia a cambia e maneho pa loke a proteccion di e terenonan aki of si un hende mester ta friends and family un biaha mas pa e ora bo por haya un pida tereno na Arashi.
Tur hende sa cu e strip ey, si mira e casnan existente, e pida tereno cu ta tira direccion di Tierra del Sol ta di gobierno y nan tin entendi cu “Minister di Infrastructura, y p’esey nos a haci e pregunta si ta e Minister di Infrastructura actual of e Minister di Infrastructura saliente, ta esun cu a firma pa mil meter cuadra di tereno protegi wordo otorga contra tur regla.”
E politico ta bisa cu ta bon pa menciona aki cu e Minister anterior, Oduber kende semper tabata yena su boca cu ta protege tur wetland of cualkier otro land, pero su persona si a percura aparentemente, pa mil meter cuadra bay pa un campaign manager di Minister Dangui Oduber.
Fraccion di AVP a haci pregunta y ta spera di haya contesta rapidamente pa asina por informa comunidad cu e informacion aki ta veridico caminda a percura pa un campaign manager haya tereno y tin cu mustra aki cu e campaign manager aki ta mara na un compania cu den futuro lo tin cu bay atende cu loke ta terenonan di port city.
“Nos a spera cu e cosnan aki no tin di haber cu otro y p’esey nos a dirigi pregunta na e actual Minister di Infrastructura pa nos ta sigur di kico ta pasando ya cu tur hende sa cu den e gobierno aki ta bagamunderia tin den dia cla y nos tin cu desenmascara cada un di esakinan manera cu nos detecta e actonan aki,” lider di fraccion di AVP, Marlon Sneek a declara.
