“Nos no a fiha un posicion ainda. Pa nos tur cos ta sorpresa ‘ki. Pero dialuna trempan nos ta yama reunion y miembronan lo dicidí”, asina Erick Henriquez, presidente di Sindicato Independiente WEB Aruba (SIWA) a contesta riba nos pregunta. De facto, ta cerca nos el a lesa e noticia y a haya confirmacion di dje, pero ningun hende a informa SIWA oficialmente, locual e ta considera un mal hecho.
Diabierna atardi a bira conoci cu mr. Chris Lejuez, abogado di Ing. Luis Oduber, director di WEB Aruba N.V. a yega na un acuerdo cu abogado mr. Anthony Ruiz di Bufete di abogadonan Croes, Wever & Ruiz, den representacion di Utilities Aruba y Gobierno di Aruba. Nan rol tabata pa negocia pa core cu e dos directornan di WEB Aruba N.V., mara na un suma di placa, pero cu condicion cu ningun hende ta bisa nada mas despues.
E sindicato a bisa cu, lo no haci e mesun eror di tempo cu a permiti pa a bin cu Oslin Boekhoudt di Valero pa bira director di WEB. E biaha aki nan lo para riba pa un di “nos mesun hendenan den compania”, cu conoce e cultura di WEB, cu conoce e retonan y sa di produccion di awa y coriente, asumi e funcion ey. Tambe nan kier sa e motibo pakico a core cu e directornan y e pakete di compensacion mara na dje. “Pasobra si tin tanto placa pa paga pa directornan, anto mester tin placa pa trahadonan tambe”. Lesa mas awe den e edicion di TREMPAN.
