Gobierno a reuni cu e sindicatonan pa atende cu diferente punto eelaciona cu e crisis financiero cu Aruba ta bay pasa aden door di e coronavirus. E sindicatonan a sali for di reunion despues di algun ora pa asina trece padilanti kico tur a wordo trata.
E sindicatonan tabata warda riba e reunion aki cu Gobierno pa trece padilanti e preocupacionnan di empleadonan publico. Sindicatonan lo tin cu reuni cu miembronan pa asina informa nan kico tur Gobierno a bin cun’e padilanti.
Segun representante di SEPPA , Magaly Brito, e empleadonan publico tabata kier a haya informacion riba tur rumor cu tin con ta bay para cu nan salario despues di tende cu e situacion ta birando poco fastioso. Sindicatonan a haya sa kico ta e pensamento di Gobierno y con nan ta bay sigui paga e salarionan di empleadonan publico p’e siguiente lunanan. Dia 9 di April ultimo Gobierno a haya un ok p’e “zachte lening” for di Hulanda y tin condicionnan na dje. Den e condicionnan aki ta entre otro tin cu baha e gastonan personal di sector publico. Den cuadro di esaki Gobierno a propone den totalidad pa rebaha e salarionan cu 5%, corta vakantie uitkering, gelijk bedrag y reparatie premie cu 50%. Gobierno tambe lo haci entrega di nan salario cu 10%, pero tin otro cosnan cu lo haci efecto pa nan y lo yega na un totalidad di 15%.
Esaki ta nifica cu pa empleadonan publico lo corta rond di 12.6% y haciendo un comparacion ta trata di 2.4% di diferencia, unda cu ministernan y parlamentarionan lo entrega 15%. Sindicatonan a trece diferente pensamento treci dilanti cerca nan di kico Gobierno lo mester haci si ta asina. Ta wordo bisa cu si kier pa baha salario, Gobierno mester haci esaki prome. Tambe a bisa cu si empleadonan mester entrega 5% y gobierno di su banda tambe lo mester minimo un 10% of 15%. Gobierno mester manda un plan pa gobierno di Hulanda pa asina haya un decision si Aruba ta haya lening of no. E realidad ta cu Aruba ta den un situacion hopi dificil y no por core p’e tipo di discusionnan aki. Gobierno ta spera cu pa dia 1 di Mei por tin un decision di parti Hulanda si ta bay over na duna pais Aruba placa pa por sigui cubri y entre otro yuda e cantidad di empleadonan cu no tin entrada pa motibo di perde trabou. Tambe pa mira den cuadro di e crisis aki kico por haci pa yuda comunidad sinti menos e peso cu locual COVID-19 a trece cun’e.
Un peticion haci di parti Gobierno ta pa sindicatonan bin bek di biaha, pero a ilustra cu tin “Shelter in Place” awo y pa reuni tur miembro di biaha no ta facil. Pa por bin cu un decision no ta facil, pasobra tin diverso riba ki forma Gobierno lo tin cu baha nan gasto. Segun Brito, na final mester yega na algo conhunto. Aki ta papiando riba salario di hende y no ta asina cu ta yega na un decision y empleado ta bay tum’e. Tin cu tuma un discusion sano y cu cabes friu pa por yega na algo cu en berdad por yuda Pais Aruba y conhuntamente por carga e peso aki. SEPPA ta spera di por haci e fin di siman aki contacto y log uit decisionnan cu nan miembronan. E no ta facil y Gobierno ta bisando cu nan tin presion di tempo riba nan. Segun Brito, kisas esey ta irita nan cu no ta haya manera nan ta bisa un aprobacion automatico of di biaha. Sindicatonan ta representa hendenan, pero tin e obligacion di duna informacion pa por fiha un posicion pa tur hende.
Maestronan ta na cas y ta dunando les na un forma digital. Josephine Albertus, presidente di SIMAR, a bisa cu nan a ricibi diferente informacion y situacion cu Aruba ta den, cual ta algo hopi precario. Esaki ta algo cu ta tendiendo di hopi dia caba. SIMAR a vocifera cu maestronan ta compronde e situacion, pero desde a bin cu “Shelter in Place” y “samenscholing verbod” e maestronan no ta trahando cu skeleton crew. Henter e team ta trahando y ta dunando mas di nan mes, pasobra den dia nan ta bezig cu e muchanan y purba di yega na tur mucha.
Nan sa cu e digitalisacion ta pone cu e problema social Aruba ta pasando aden, no ta tur mucha ta haya e mesun educacion of enseñansa cu otro. Docentenan, maestronan ta haciendo tur loke por pa yega na tur mucha y ta compronde cu e situacion ta precario. Gobierno tambe por mira den nan mesun seno unda por baha mas y esey ta algo cu Hulanda a bisa nan. Gobierno a splica sindicatonan cu nan tin di bay baha gastonan den nan mesun seno, segun Albertus. SIMAR ta haya cu Gobierno por a bin cu otro cambionan, unda no ta afecta e ambtenaarnan cu ta trahando.
Ministernan y parlamentarionan ta entrega 15% y restonan di ambtenaar 12.6%, cual diferencia ta chikito di 2.4%. Segun SIMAR, nan a splica Gobierno riba e diferencia di e gemiddelde di ambtenaar. Ora a papia di indexering di un salario di 4200 florin y tin cu kita 12.6%, pero un salario di minister of parlamentario cu ta mas o menos 13 mil y ta kita 15%, e diferencia ta hopi grandi. Si ta papia di solaridad, SIMAR ta haya cu no ta papiando di esaki. E diferencia ta hopi grandi. E sindicato ta compronde e situacion y mester sinta na mesa pa bin cu un solucion. Sindicatonan no kier p’e situacion ta cu Gobierno ta impone algo, pero mester tin tempo pa bay bek na miembronan. SIMAR ta un sindicato di base y kier bay bek na miembronan y splica nan tur cos ricibi. Mester tempo pa compronde situacion y mira e cifranan. Sindicatonan lo haci nan esfuerso pa reuni cu miembronan den fin di siman pa asina dialuna por sinta bek cu Gobierno. Segun Albertus, Gobierno kier un contesta lihe, mirando e situacion precario.
