Despues di a haya un carta di parti di Prome Minister mr. Evelyn Wever-Croes, caminda cu ta indica n’e sindicatonan cu e recorte ta continua, e sindicatonan a indica den un rueda di prensa extraordinario diabierna, cu e accion lo intensifica y dialuna awo nan lo reuni na Linear Park pa 7:30 am, pa despues nan sali bay Bestuurskantoor.
Edward Maduro, presidente di SADA a comenta den nomber di e demas sindicatonan nan a bin ta atende cu gobierno riba e hecho di e recorte salarial pa algun luna.
Diaranson ultimo nan tabatin un dia nacional di accion, unda cu tur sindicato cu a participa n’e manifiesto di dia 25 di november, a yama nan miembro den un accion di algun ora, unda cu a sali y demostra nan mal contento p’e manera con gobierno ta atendiendo cu e empleadonan publico y semi-publico y e pensionadonan.
Diahuebs, e sindicatonan a bin hunto pa asina evalua con e dia di diaranson a bay, unda cu cada ken a trece nan punto dilanti cu e mandato cu nan a haya for di nan miembronan durante diaranson. Diahuebs, despues di a reuni y a kibra cabes, a manda un carta habri pa gobierno, n’e mesun manera cu a manda un carta p’e sindicatonan, a contesta gobierno y a laga nan sa cu e sindicatonan ta keda para riba nan punto unda cu ta haya cu gobierno no ta transparente, no ta sincero, ni cu e sindicatonan, ni cu e trahadonan y tampoco cu pueblo.
E momento ey a bisa gobierno cu ta duna te cu 12:00 pm di diabierna merdia, pa revoca e 12.6% pa asina ey traha caminda pa yega na mesa pa bay den un discusion con lo bay atende cu algo cu por reemplasa e 12.6%.
Lamentablemente diabierna merdia a haya contesta di gobierno, unda cu ta keda para riba nan punto cu no por hala atras di e 12.6%.
Den un carta cu a manda e sindicatonan a pone algun punto unda cu ta lamenta e manera con gobierno ta bin dilanti den nan carta. Sinembargo mucho no mester bisa. E punto principal ta cu esey a conduci cu e ora a dicidi e momento ey cu lo bay escala e accion manera el a tuma luga diaranson cuminsando dialuna mainta, unda cu lo bay yama tur miembro di tur sindicato y tur no-miembro cu ta sinti nan mes perhudica pa loke ta e recorte di 12.6% y cu tambe ta di opinion cu gobierno no ta sincero cu trahado.
Ta yama tur hende pa un accion dialuna awo, 7:30 am riba Linear Park, unda cu for di eynan tur miembro di sindicato, no-miembro y pensionado, hunto cana bay Bestuurskantoor y mustra nan mal contento pa con gobierno ta atendiendo cu e trahadonan, tanto den sector publico, semi-publico y pensionadonan.
Dialuna awo lo reuni pa 7:30 na Linear Park y despues cu tur hende yega, lo sali bay Bestuurskantoor. Lo keda ey te cu 12:00 pm.
Tin di remarca cu den e accion aki, e agentenan policial no lo uni n’e marcha, mirando cu tin cu mantene cierto protocol cu nan tin di cumpli cu ne.
Ta p’e motibo aki mes nan lo tin den cada warda di polis lo tin un capacidad minimo entre 7:30 am te cu 12:00 pm.
Pa un cobertura mas amplio lesa e edicion di TREMPAN di mañan.
