Berdaderamente nos por papia cu nos ta biba den un estado democratico? E ta un situacion cu no ta bin for di awo. Si nos mira kiko a pasa aña pasa den Parlamento caminda un minoria a vota pa baha un minister y a keda para ariba cu nan decision tuma ta legal. E carta di nos gobernador ta confirma cu e votacion cu a tuma lugar aña pasa den nos Parlamento ta uno illegal.
Despues di un aña e carta ta mira luz di dia e berdad ta sali na claridad y ta confirma cu e votacion tabata uno illegal y ta contra di nos Constitucion cu otro palabra un mancha scur riba nos democracia. E berdad aki ta hasi dolor? Nos mester por cuminsa na refleha cu e direccion aki cu nos isla ta bayendo ta completamente robez. Un cos sigur ta cu e ta refleha cu nos Parlamento a perde su poder y autoridad. Kiko nos mester pensa?
Una bez cu den un gobierno ta tuma un decision y no tin e descencia di sikiera informa su partner di coalicion di e decision tuma. E partner di coalicion mester realisa cu no respet mas pa nan y nan no tin nada di bisa mas. Asina aki nos por papia di bon gobernacion? Nos por papia di integridad? Kiko nos mester pensa di tur esaki? Paso una bez bo firma un acuerdo cu ta mara henter nos pueblo pa 20 aña largo kiko nos mester pensa? Nos parlamento como nos organo mas halto na Aruba no tin nada di bisa mas y no tin voz mas? Mester considera acto aki como uno dictatorial? Aruba no ta Cuba. E ta un ponencia cu ami ta dicidi y punto. Bo no tin nada di bisa paso ta ami ta manda.
Si nos bai den historia nos por corda e November scur di aña 2000. E tempo ey a bolter auto y a pege na candela pabao di Bestuurskantoor. Pa kiko? Paso gobierno a firma un contract pa e projecto di race-track cu mester a bin na Seroe Colorado y ta daña nos naturalesa. Nan tin e ponencia cu ora nan ta den gobierno ta nan ta dicidi y nan por hasi locual cu nan kier. E echo por ta malo pero den nan bista e ta bon y punto. Despues di tanto aña e construccion di un hotel na Seroe Colorado no ta daña e naturalesa mas paso nan ta den gobierno. Awor si e no ta hasi ningun daño mas na nos medio ambiente. E caso di race-track aki a costa pueblo di Aruba un dineral. Gobierno a bai bringa e caso den exterior y a perde e. Ta ken a sali perdi? Pais Aruba atrobe y mester a paga pa no cumpli cu e contract firma. Claro e placa no ta sali for di nan saco sino for di pueblo. Asina ta sigui malgasta placa di pueblo. Esaki nos ta jama amor pa nos patria?
For di momento cu gobierno a cuminsa na kita e directeur di utilities y dune un golden handshake. Un luz mester a cende. Nos wowonan mester a habri pa mira unda gobierno aki kier jega. Mi ta kere cu un ciego mes lo mira. Gobierno no tabata tin motibo of argumento valido pa retira ningun di e directornan. Ken ta paga? Mesun modus operandi a wordo usa cu e directornan di WEB N.V. y akinan tambe nan mester keda paga nan te cu ora cu nan edad di pensioen jega. Ken ta paga? E calculacion ta di mas cu 2 miyon florin pa retira e 2 directornan aki. Ora a caba di retira e tur e directornan cu ta stroba y cu ta den caminda ta mas cu logico cu no tin mas strobacion pa ehecuta e plan maestro pa firma cu Eagle LNG. E directornan cu a ninga di firma for for di un principio no tey mas. E directornan a prefera di bai y no firma un acuerdo cu nota na beneficio di WEB y mucho menos di pueblo di Aruba. Despues di a kita e directornan cu no ta firma y gobierno ta pone su hendenan cu si ta bai firma e contract. Done deal.
A traha un contract den secreto. Pakiko? Simplemente paso tin cos di sconde. Un contract di 85 pagina . Si e tabata un gran logro y historico lo tabata tin un fiesta pa e bon trabao pero a pone un fiesta scondi. Si tin un cos cu e gobierno aki ta gusta ta fiesta. Esnan cu no kier mire asina ta paso nan no kier. Esaki ta e modus operandi cu wordo usa den paisnan comunista.
Esaki ta e motibo cu mester a bula cabez di directornan di WEB pa deal por bai door. Un minister cu ta bisa cu no sa e contenido un acuerdo di 85 pagina cu Eagle LNG pero diripiente un paar di dia despues ta pone su firma abao symbolico si. E ta symbolico of e ta diabolico. Pueblo di Aruba lo mester kere e storia “Hans en Grietje” aki?
E momento a jega cu e cama ta drecha y no tin nada pa stroba mas. Awor ta e tempo perfecto pa e plan wordo ehecuta. E acuerdo segun nos por compronde a wordo firma cu Eagle LNG den e siman di 19 di November y ta mara nos pueblo pa 20 aña largo pa suma di 1.6 biyon. Si deal tabata asina bon hinca den otro lo tabata tin un fiesta grandi pero tur cos tabata scondi. Ora informacion a leak a corre pone un ceremonia. A cuestiona e deal di Citgo di e gobierno di avp pero awor ta bira hasi pio.
Dos scenario por tin. E parlamentarionan di coalicion no tabata sa di e contract of nan ta hasi como sifuera cu nan no tabata sa. Un cos ta sigur Parlamento den totalidad no a wordo informa cu cu e deal cu Eagle LNG a wordo firma y tampoco parlamentarionan por a haya e contract pa mira. A dicidi cu Parlamento no ta importante paso simplemente a tuma un decision. Parlamento no ta conta y e voz di Parlamento a wordo silencia un biaha mas.
Un compania cu no tin poz di gas pero cu simplemente lo actua como un intermediario. Asina a pasa cu tur e prestamo nan di WEB N.V. y AAA caminda tambe tabata tin intermediario. Akinan a crea mas cu 1.2 biyon di debe. Eagle LNG segun mi por a compronde cu a wordo funda na aña 2013. Eagle LNG cu ta cumpra gas y ta rebende cu WEB NV. WEB NV ta e baca di lechi cu tin cu cria e compania aki paso ta mara na un contract di 20 aña largo y mester garantisa e compania 80 miyon pa aña. Un cos ta sigur e compania no ta cumpra jan y bende jan. E logica di esaki ta cu e mester genera ganashi, WEB NV tambe mester di su ganashi y finalmente esun cu tin cu contribui na e ganashi di e companianan aki ta pueblo di Aruba. Eagle +Web = ARUBA
No mester bin ningun investigacion manera cu partido Raiz ta bisa. For di 5 di November 2021 parlamentario di raiz ta manda pidi informacion for di e minister concerni y te awe e no a haya informacion. E unico informacion ta esun di prensa. E informacion cu ela haya ta di e firmamento historico. Tur prueba y informacion ta den e contract. Den e contract tin tur informacion ken ta culpablenan. Investigacion ta cla. Parlamento di Aruba tin e tarea pa saca tur informacion na luz di dia y informa pueblo di e desastre aki. E minister encarga mester wordo jama pa duna cuenta na Parlamento.. Den contract bo ta haya ken a firma y cua ta e minister encarga y e bufete di abogado cu a hinca e contract otro y cuanto placa ela gana. Tarea di e parlamentarionan ta pa solamente bisa ken ta e actornan culpable di e disaster aki. Paso keremi si e contract aki tabata asina beneficioso pa Aruba un fiesta grandi lo a tuma lugar cu e logro pero tur cos a sosode hermeticamente scondi pa ningun hende haya sa.
Esaki ta e momento pa pueblo mira di esnan cu ta sinta den nos Parlamento y cu a hura di sirbi nos Aruba dushi terra berdaderamente tin nos pueblo na pecho. Awor nos lo mira cu si nos parlamentarionan lo duna contenido real ora cu nan a hisa nan man na halto pa locual cu nan a huramenta pe. Nos parlamentarionan tin e bala den nan scochi pa pone un fin na e mentalidad comunista aki y falta di respet pa nos Constitucion. Nos no mester keda sorprendi si nada no wordo hasi. Ora un pueblo vota pa partidonan cu bai contra leynan di Dios no por spera otro. Dios lo no permiti pa nada keda scondi mas. Nos di partido CURPA ta sigui vigila e movecion nan aki. Dios ta saca tur cos na claridad.
Lider di partido CURPA.
