Directiva di SIMAR, e Sindicato di Maestronan, por a tuma nota, cu publicacion di informacion incorecto ta sali cu no ta refleha e berdad. Si ta asina cu den un relacion di trabao entre un dunado di trabao y un empleado, no ta duna informacion cu ta trata e privacidad di e contenido di e contract. No ta na su luga pa bay den detaye ariba esaki tampoco.
En realidad ta cu SIMAR a entama un caso pa yega na terminacion di trabao cu e empleada. Dia 14 di juli 2020 Hues a duna veredicto y a rechasa e peticion. Cu e decision aki tin cu continua e relacion di trabao. Un organisacion dinamico ta tene cuenta cu e desaroyonan y ta bin cu cambionan necesario, cu ta faborece e trabaonan cu tin cu keda ehecuta. E maneho di e Directiva actual ta basa ariba innovacion y modernisacion di su datonan y informacion relevante na un manera mas sofistica.
Si ta purba troce e berdad y ta trece informacionnan cu ta diferente, SIMAR ta desaproba esakinan. Den un reunion recien a sinta cu 3 partido, esta e empleada, su sindicato SEPPA y SIMAR. E informacion cual ta keda publica ta saca for di su contexto. Sindicato SEPPA a distancia su mes y a laga SIMAR su Presidente, sra. Josephine Albertus sa, cu SEPPA no tin nada di haber cu e articulo cu a sali dia 27 di juli 2020. Na un manera responsabel Directiva ta trata e asunto como dunado di trabao y su empleada manera debe ser. SIMAR no ta bay tras di ningun informacion descabeya y robes y ta mantene su mes na e reglanan vigente.
“Si, nos ta lamenta cu ta purba haci daño na e bon nomber y e integridad di nos presidente, sra. Albertus y alabes ta trata di desacredita e nomber di sindicato SIMAR,” nan a bisa. E fuente cu ta trece e informacion no a mantene e etica di privacidad y no ta actua di buena fe. Cada medaya tin 2 banda.
Den un invitacion pa un reunion general pa miembronan, cu lo bay tene luga dialuna 10 di augustus 2020, parti atardi, SIMAR lo duna e informacion corecto, pa ponenan na altura di e caso aki y duna un splicacion di e desaroyonan.
