Diamars, durante un conferencia di prensa, presidente di SIMAR, Josephine Martilia-Albertus, a trece un claridad riba e carta cu Minister di Enseñansa Rudy Lampe, a manda recientemente.
Diabierna, dia 26 di juli, e carta cu e minister a manda dia 22 di juli, pa e directivanan di scol, a wordo manda pa e miembronan di SIMAR, pa e directiva di e sindicato ya menciona. A base di informacionnan ricibi, SIMAR a tuma contacto cu e Minister. Asina a haya un cita pa dialuna merdia mes, pa por a dialoga cu e Minister riba e carta cu a haya, pasobra kier a haya mas claridad
Den e carta ta menciona cinco diferente topico. Si mira e prome topico, ta papia di lesuren, unda ta indica cu ta subsidia un scol placa pa su docentenan, pero ta depende e cantidad di alumnonan cu tin.
Si wak na un reguliere basis y voortgezet onderwijs, pa cada 28 alumno, e scol ta haya subsidio pa por paga un docente. Si mira na un reguliere kleuterschool, pa cada 24 alumno, scol ta haya subsidio pa paga un docente. Den practica sa cu e no ta asina. Ora cu a bay puntra y palabra cu e Minister, el a splica cu den ley di Aruba ta stipula cu pa cada 30 mucha, tin cu haya un subsidio, pero door cu den practica ta mustra cu no ta asina, e ta mucho hopi, a bah’e pa 28. Esey tabata e prome parti, segun Martilia-Albertus.
Di dos topico
Den e di dos punto ta para taakuren. Eyden ta skirbi cu un docente cu tin un volledige betrekking, ta traha 32 ora y e por tin 4 taakuur so. Pero den practica pa duna calidad den enseñansa, e no por keda solamente na 4. E Minister a menciona cu cada caso, cada docente, cada taakuur, lo evalua. Eynan ta bay wak si e taakuur por baha of por wak si por parti’e cu otro docente. Tin docente actualmente cu ta consehero. Pero en realidad nan no ta, pero door cu no tin ningun hende nan a haya e taakuur di un counselor. E ora e scol tin cu bay busca un hende cu ta studia pa haci e trabao, pa asina e docente por duna les, segun cu e Minister a bisa.
Tin taak uur na EPI por ehempel, cu tin docente cu ta stagecoordinator cu cuater ora, no por regla tur e alumnonan y stage. Eynan tin cu bay wak con pa duna e forma. Of pa bay cambia e nomber di taakuur, pa haci’e lesuur. Eynan ainda tin cu bay wak.
Di tres punto
E di tres punto ta papia di overtime. E carta ta bisa cu tur overtime di docente ta para. En realidad un docente no ta traha overtime. Ora cu traha overtime, ta paga 150 pa 200%. Un docente sa traha extra ora y pa e extra oranan cu e traha, e ta haya e pago di 100% normal di pago. Pues no ta haya pago di overtime.
A pidi e Minister pa clarifica. Por ehempel si un docente ta traha 32 ora, ta pag’e full su salario, henter aña normal. E docente cu tin cu traha 36 ora, tambe ta haya su pago normal henter aña.
E minister a menciona cu si e docente pasa 40 ora, e oranan despues, ta bira losse uur. Pa ley stipula na Aruba, un docente por haya un maximo di 36 ora y si e tin cu bay di 36 pa 40, mester pidi permiso na e Minister.
Antes tabata te cu 40, pero durante Minister Dowers, nan a bahe te 36. E parti caminda cu e docente lo bay atras den nan salario, a clarifica esey dialuna. E Minister a laga sa cu te cu 40 ora ta paga normal.
A puntre riba e oranan los. E Minister a splica cu lodse uren ta bin ora cu un docente pasa su 40 ora, e ora ta bira lodse uur, no work no pay. Tambe tin e parti di losse uur, caminda cu ta traha 32 ora mainta como docente y e ora ey ta traha atardi y anochi, e oranan ey, cu si ta tuma como losse uur. Si bo no traha e anochi, bo no ta wordo paga. Den vakantie y fin di siman, no ta wordo doorbetaald tampoco.
Cierto docente ta traha 28 ora, pero ta haya pago complete. Otro docentenan por bisa cu nan tambe kier traha anochi, pero e ora ey a splica cu e docentenan ey no lo wordo paga mas complete tanten cu e no surpasa e 32. Si e persona aki, cu ta traha 28 mainta y traha avondschool pa 4 ora, e ta bira 32 ora y su salario ta keda mescos. E no ta bay haya pago pa e 4 oranan di anochi pasobra cu esey el a complete su 32 oranan di un full time complete. Si e surpasa, of en bes di traha 4 ora, y traha 5 of 6 ora, e ora ey pa e un of dos oranan cu e surpasa, ta pague e losse uur.
E ultimo punto ta e cambio di dianan di vakantie cu no a uza, cu di inmediato no ta paga esakinan mas, Esey ta algo cu ta un tiki fastioso, segun e Presidente di SIMAR. Cierto scol si ta pagu’e y otro no. Pero segun e mandatario, esaki ta bay wordo paga mas. A splica e mandatario cu tin cierto scol cu cada biaha cu un docente pidi e dianan, nan ta bisa cu e servicio no ta permiti esaki. Den LMA ta para cu si den dos aña no tuma e dianan di vakantie, bo ta perde nan. E Minister a splica cu ora cu tin dianan di vakantie cu no a wordo tuma, scol mester firma pa nan wordo tuma ora cu e docente pidi pa esaki. No ta paga nan manera antes mas. Mester tuma nan prome cu vakantie of despues di vakantie y den e siguiente aña escolar.
Ora cu a haya e claridad, ta haya jammer y a bis’e cu nan ta lamenta cu e no a tuma contacto cu SIMAR, pasobra nan a haya e carta aki for di un miembro y no door di e Minister. E Minister a splica door cu e tabata den dialogo cu e directivanan di scol, mirando cu e finanzanan no ta bayendo bon. Awor aki cu vakantie ta cabando y hopi directiva di scol a surpasa nan presupuesto caba, a pone cu pa fin di aña mester pidi un suma extra. Esey ta algo cu su Ministerio no kier. P’esey a sinta cu e directivanan pa mira con ta bin cu un solucion.
Segun SIMAR, si e Minister kier bin cu un solucion, dicon a bin cu un carta asina abrupto cu ta duna e diferente puntonan aki. Tambe a bisa e Minister, cu ta haya cu e carta no ta duidelijk. Si tuma e ehempel di overtime, aki ningun caminda e Minister a pone cu ora cu pasa 40 ora, e ta bira overtime.
Segun presidente di SIMAR, nan a bisa minister cu otro biaha cu bin cu un carta, tuma contacto cu SIMAR, y asina wak con ta formula e carta. E confusion cu tabata tin tabata innecesario. “SIMAR ta contento cu e miembronan a bin cerca nan pa asina sali afo pa nan derecho. P’esey SIMAR t’ey y ta keda bisa pa sigui haci esaki. Nan ta contento tambe cu a haya chens hopi lihe pa por yega cerca Minister pa haya claridad pa e docentenan, pasoba SIMAR t’ey pa nan y kier un enseñansa di calidad y pa por haya esaki mester percura pa e derecho di e docentenan bin p’adilanti.”
