E situacion na Venezuela ta sigui percura pa retonan sin precedencia y ta demanda hopi atencion di Gobierno di Aruba. En bista di desaroyonan den region, Gobierno di Aruba a dicidi pa prohibi tur tipo di importacion, exportacion y transito di oro di procedencia directo of indirecto di Venezuela. Esaki a keda publica den e Afkondigingsblad AB 2019 no. 43.
E tema di importacion, exportacion y transito di oro di Venezuela ta topico di discusion mundial y a causa daño na imagen di Aruba. Na Aruba durante gobierno anterior, esaki tabata pasa frecuentemente. Gabinete Wever-Croes ta scoge pa drecha e imagen di Aruba internacionalmente. Recientemente Corsou tambe a yega na un decreto similar (P.B. 2019, no. 25).
Cu esaki Gabinete Wever-Croes ta pone un punto final tras di e discusion cu si e importacion of exportacion di oro ta un negoshi legitimo of no. E no ta legitimo y ta keda prohibi! Ta cu e tono ey Prome Minister Wever a termina su relato di prensa, den cual e ta ataca e negoshi di importa oro…negoshi cu e conoce masha di cerca y cu personalmente a cobra placa indirectamente di e “negoshi no legitimo di oro”.
Ta bale la pena agrega si, cu e negoshi di oro na Aruba tabata tuma luga den oficina di e mesun Prome Minister awe. E compania Pa Oro ta estableci den Arulex Building pa mas di 7 aña y bufete di abogadonan Croes-Wever-Ruiz mes a prepara tur documento, regla permiso y maneha administracion di e compania di oro. Pa awor sali bisa cu e negoshi di oro ta ilegal ta masha cuestionabel.
E comunicado di prensa ta menciona cu bou di e Gobierno anterior a permiti importacion di oro, pero a lubida di bisa cu ta di compania estableci na Arulex Building y cu director di e compania tabata bodyguard di Prome Minister Evelyn Wever pa mas di un campaña. Awor na mando, a kita man laga “Toro” cay manera patia berde!
