Recientemente Ministerio di Desaroyo Teritorial, Infrastructura y Medio Ambiente a pidi pa tur hende haci un re-inscripcion na Departamento di Infrastructura y Planificacion (DIP). Esaki tin di haber cu huurgrond. Gobierno a traha riba e parti di ROP, esta destinacion di diferente area di Aruba. Tin gran parti di e areanan aki destina pa tereno di huur.
Tin un interes grandi den plantacion, gobierno ta percura pa haci un update di e bestand di e departamento aki. E motibo cu a pidi hende pa re-inscribi of inscribi ta pasobra den e ultimo 10 añanan e departamento tin peticionnan cu hendenan tin huurgrond, tin hende ta pagando y tin cu ta plantando pero tin hendenan tambe cu no ta haci esaki.
E registro cu tin ta un vervuild bestand, parti di dje no ta actualisa, pues e no ta completo of ta anticua. Minister di Desaroyo Teritorial, Infrastructura y Medio Ambiente, Marisol Lopez-Tromp, kier pa esaki ta up to date pa por haci un uzo efectivo di e terenonan aki cu nan meta ta pa planta.
Debi cu tin Shelter in Place a pidi pa registra online, pasobra normalmente ta custumbra pa bay na e departamento cu tur papel y entrega esakinan. Despues di tempo ta atende cu e peticion y si e rekisitonan no ta completo por entrega esakinan ainda. Pero cu Shelter in place hendenan mester keda cas, pero trabounan interno a sigui p’esey a opta pa laga hendenan manda e peticion online. Haciendo esaki e departamento por actualisa nan datonan cu nan tin di esnan cu a re-inscribi y esnan cu a inscribi.
Den e ultimo simannan DIP a ricibi cantidad di email, segun e mandatario. Den e peticion online tin diferente cos cu e persona mester yena manera adres, telefon pa por tuma contacto y email adres como peticionario. Tambe un persoonsnummer como peticionario, copia di identificacion, paspoort of rijbewijs, copia di registro di Camera di Comercio y no mas cu 1 luna bieu. Mester manda tambe e proyecto cu ta haciendo caba of cu ta bay haci, esta kico ta bay of a planta. Alabes un prueba di 35 florin paga online y esaki tin di haber cu e ley di Lesions y Distributie. Ta importante pa haci esaki pa procesa datonan.
Si DIP no a haya e peticionnan di re-inscribi, lo considera e peticion aki como cu no ta interesa mas den e tereno. A bin cu esakinan pasobra den transcurso di tempo no ta haci uzo di e huurgrondnan cu e meta stipula den ley. Pa evita esaki, nan ta haci un update di esaki. Esnan cu no ta logra haci esaki online, unabes cu kita Shelter in Place, abase di un cita cu DIP por haci e inscripcion.
