Aunke e situacion na Aruba ta dificil, comerciantenan mester pensa hopi prome cu dal porta di negoshi cerca. Esaki Frans Ponson, director di Do It Center, a bisa. Na prome luga mester pensa cu si cera negoshi, e ta nifica menos placa pa caha di Gobierno pero tambe menos hende ta bay tin trabou. “E ta un tema dificil pasobra ningun comerciante kier kita hende for di trabou.”
E ta kere cu mester bini un flexibilisacion di leynan laboral, locual aworaki no ta duna nan e espacio ey. Aworaki si kier baha salario, e mester papia cu e trahadonan prome. “Hopi trahado ta wak e situacion aki y nan ta coopera. Pero tin compania unda cu trahadonan ta bisa cu e empresa mester tabatin reserva y no ta coopera. E ora ey Gobierno mester por yega na un acuerdo cu e comerciante pa e tin mas flexibilidad pa baha e salario. Si no haya tools pa traha cu ne, hopi comerciante ta bay cera nan negoshi. E ora tur hende perde, e compania, e trahado y Aruba.”
Cada compania cu cera, el a splica, ta nifica menos placa pa traha di Gobierno y esaki ta trece cu ne consecuencia pa un y tur. “Hunto nos mester traha pa sali di e situacion aki. Mi ta kere cu Gobierno mester haci algo riba e ley laboral pa duna e comerciante un poco di espacio.” El a agrega por ehempel e herment ta duna nan e chens pa tuma cierto decisionnan y Gobierno na final ta control si e comerciante tin autoridad pa haci esaki.
E ta sigui bisa cu si un comerciante bay na cero entrada, e mester baha e orarionan, locual aworaki no ta posibel.
E empleadonan no mester lubida cu Aruba tabatin un debe caba y awo cu e crisis di COVID-19 mester a presta placa cu ta haci cu na final di aña Aruba por cera cu un debe di 1 biyon florin, sin conta e debenan bieu. Y den tur esaki mester bini ainda e Reforma Fiscal Fase 2. “Kico cu nos haya di Hulanda awo mester paga bek. Ta e comerciante y e pueblo mester paga bek. Hulanda nunca a bisa cu ta haya e suma regalo. Pidi ta facil, paga bek ta dificil. Esaki ta algo cu mester dialoga riba dje.”
