Desiree G. Croes: Minister Lampe ta mustra falta di respet pa scolnan publico

824

Cu asombro cabesantenan di diferente scolnan publico a tuma nota di e cambionan proponi door di Minister di Enseñansa. Den e cambionan aki scolnan publico lo core e riesgo di perde no solamente nan identidad pero tambe tur trabou cu nan a hinca den e.o nan  edificio, nan curiculo y nan alumnonan.

Entre otro Minister Lampe ta sugerí pa hinca diferente scolnan publico bou scolnan confesional cu base religioso. Haciendo esaki Minister Lampe no solamente ta mustra poco consideración pa cu e libertad di escohencia di e mayornan pero tambe no ta tene cuenta cu e derecho básico riba enseñansa sigun nan filosofía di cada studiante. E derecho aki ta ancra den nos constitución den articulo I. 20 bou di derechonan basico. Un scol publico ta habri pa tur mucha, di cualquier religión of filosofía di vida, sin haci distención. Scolnan publico na Aruba a mustra cu nan ta traha riba un nivel kwalitativamente halto y cu bon resultado.

E grupo di cabesantenan di scolnan publico ta sinti cu Minister Lampe no ta scucha nan cu ta esunnan cu sa kico ta come y bebe den Enseñansa, pero ta ponenan un banda y después ta expect cu cabesantenan sigui’e den un plan sin haya un bon splikacion. Te awor e comunicación tabata un “eenrichtingsverkeer”, pues tarea for di Minister den dirección di maestronan sin cu e maestro ta haya oportunidad di duna input. E ultimo proposición di cambionan a pasa na mes manera, esta sin puntra opinión profesional di e maestro cu na fin dia ta esun cu mester traha cu loke Minister ta propone.

Fuera di esaki e cabesantenan ta lamenta cu net den e temporada difícil cu docente, mayor y studiante a caba di pasa aden, lo mester sigui un periodo di paz y tranquilidad, envés di esey Minister Lampe ta trece incertidumbre y intranquilidad cu su cambionan repentino y sin duna splikacion drechi. Nan Hulanda p.e. ora ta fuseer un scol e petición aki mester pasa un toets pa por wordo ehucuta, unda entre mas lo mira cu si e fusie aki ta den bienestar di alumno, docente y enseñansa den su totalidad. No por hisa benta cu scolnan publico ni cu docentenan cu añanan largo a duna nan 100% pa nan scol.

E cabesantenan di scolnan publico pues NO lo acepta e cambionan cu Minister Lampe ta propone sin mas. Nan ta sinti cu haciendo esaki nan lo laga tanto e mayornan  como nan alumnonan na caya. Pa e motivo ey a acerca un abogado pa guía- y consehanan den nan afán pa proteha nan scolnan contra desicionnan descabeya di Minister. Na mes momento nan ta spera cu Minister President si dunanan oído y para tur plan di Minister Lampe te ora  cu bin mas claridad riba loke por spera di e cambionan aki y cu si verdaderamente e cambionan aki ta den interés di Enseñansa di Aruba y no di Minister Lampe.