Shete aña CURA DOET: Atrobe un edishon sumamente eksitoso a pesar di un situashon insigur!

227

E di shete edishon di CURA DOET a lansa aña pasa riba 28 di òktober, ku e lema “Hasi bon, ta sinti bon” i esei berdat tabata e resultado! CURA DOET a inisiá riba djabièrne 13 di mart den un situashon un tiki insigur mirando e desaroyo ròndó di e coronavirus aki na Kòrsou. E promé boluntarionan a yega e proyektonan entusiasmá pa asina yuda e organisashon nan sosial realisá nan soño.

Riba e promé dia di e akshon, hopi kas i grupo di grandi, a hasi uso di e dia pa organisá aktividatnan ku normalmente nan no por hasi. Un di e proyekto nan ku a destaká tabata esun di Kas Hugenholtz. Huntu ku militia di Kòrsou i Defensa den Karibe nan a transformá e tereno di e kas den un area pa kamper ku tènt, kamanan i otro ekipo militar. Pa e grandinan un eksperensia úniko pa asina nan por stimulá nan sintínan. Por ehèmpel, Fundashon Sonrisa tambe a organisá un piknik pa su grandinan ku bailamentu.

Pa nan un mainta inolvidabel. Riba djasabra mayoria proyekto a sigi pero ku medida nan di prekoushon adishonal. E tim di CURA DOET a kompartí algun teps komo prekoushon i tambe a tene tur organisashon nan na altura pa loke ta e desaroyo di e situashon. Nan a tuma kontakto ku tur organisashon nan ku tabata tin proyekto ku grupo di enfoke vulnerabel manera hende grandi i huntu ku e kordinadornan a evaluá e proyektonan. Algun proyekto a kanselá i algun proyekto den relashon ku hende grandi a keda posponé pa un otro fecha. Partisipashon di skolnan e aña aki atrobe tabata tremendo! Hopi di nan a skohe e momento aki pa asina nan embeyesé nan skol. Por ehèmpel Radulphus College i J.F Kennedy School, ku tur dos awor por disfrutá di un mural sumamente bunita.

Diferente skol, sentro di barionan i scouting a tuma e oportunidat pa hasi limpiesa, traha òf mantené nan greenhouse, limpia i transformá nan plenchi di hunga, kurá di skol of sentro di bario. “Pa mantené un skòl of krèsh ta algu ku mester hasi tur aña di nobo i nos ta sumamente kontentu ku nos por konta ku e apoyo di CURA DOET” sigun Sra. Bart, kabesante di Fundashon Kresh Tera Kora. Museo, organisashonnan kultural i organisashonnan di naturalesa tambe tabata bon representá. Den total nos por papia di 360 proyekto ku a tuma lugá e wikènt aki. Pa hopi kompania CURA DOET a bira un tradishon na kua nan ta partisipá i ta hasi esaki komo un dia sosial pa nan empleadonan. Manera tur añanan anterior e kompanianan a kontribuí ku rekurso humano i finansiero na diferente kaminda. Skolnan tambe ta partisipá ku nan alumnonan pa laga nan sera konosí ku organisashonnan sosial, trabou boluntario i pa fortifiká e sentido di komunidat.

E organisashon di CURA DOET ta den man di Curaçao Cares ku sosten di Oranjefonds i Reda Sosial. E organisadornan ta wak bèk riba e edishon aki ku hopi satisfakshon. A pesar di tur insiguridat, nos boluntarionan, den un momento krusial, a buta nan skouder bou di tur e proyektonan i asina a duna nos isla un boost positivo. Un palabra di gradisimentu na Kòrsou kompleto, i sigur e míles di boluntario ku a partisipa pa realisá un kantidat enorme di trabou a pesar di e situashon insigur kreá dor di e virus COVID-19. Huntu nos ta fuerte, awor mas ku nunka!

Comments

comments