Lo ta bon como ex-diputado di Teritorio Insular, tempo cu Aruba ainda tabata parti di Antias di 6, mi persona encarga cu entre otro Cultura tabatin e oportunidad pa traha riba e proyectonan cu awe ta parti integral di nos historia, cu ta nos Himno, Bandera y Dia Nacional.
Awe Betico Croes (dfm) como lider di partido MEP den cuadro di nos lucha pa sali for di e constelacion Antiano a bin den Eilandsraad di Aruba cu e proposicion pa nos mes prepara nos himno y bandera. E motibonan tabata identidad y union di e pueblo Arubano.
Comision Himno y Comision Bandera
E ora ey como diputado nos a nombra 2 comision cu nos hendenan pa prepara nos himno y bandera. Comision Himno tabata consisti di e miembronan Maybelline Arends-Croes, Rufo Wever, Juan Chabaya (Padu) Lampe, Eddy Bennett, Hubert (Lio) Booi y secretario Juan E. Wever.
Comision Bandera tabata consisti di e miembronan Julio Maduro, Wouter van Romondt, Ronald Donk y como secretario Juan E.Wever.
E pueblo mes a participa den un concurso pa por yega na un diseño y color di nos bandera. Pa yega na nos himno tabata mas facil, pasobra Padu Lampe (dfm) y Rufo Wever (dfm) ya tabata tin un composicion cu tabata ser toca y uza caba. Solamente Lio Booi (dfm) a agrega un couplet cu al final Eilandsraad di Aruba a acept’e cu solamente sosten di e miembronan di MEP y di sr. Domi Tromp di PPA.
Colornan di nos bandera
Pa nos bandera nos Bestuurscollege a busca ayudo na Merca di e.o. “Flag Institute” di professor Whitney Smith cu a manda un experto sra. Sara Bollinger pa yuda e comision y nos gobierno cu guia y conseho.
Al final dia 16 di maart 1976 como diputado encarga mi mester a defende e proposicion cu nos a tuma over di e comision pa nos bandera. E tempo ey e polarisacion tabata grandi. AVP y PPA a opone y a vota completamente contra e bandera pa motibo di e geel y cora den e bandera y tabata liga esaki cu MEP. E realidad tabata cu e blauw ta di nos cielo y lama. E geel ta di nos prome industrianan di oro y aloe. E blanco ta di nos santo di lama. E cora ta simbolisa e lucha. E strea unico di 4 punto tabata simbolisa e direccionnan di biento y cu nos e tempo ey caba tabata tin hendenan cu a bin di varios pais y haci Aruba nan cas.
Proceso cu hopi dificultad y discusion
Pa por a haya e bandera y tin e himno pa inaugura dia 18 di maart 1976 tabata un proceso cu hopi dificultad y cu a trece hopi discusion. Hasta Gezaghebber di e tempo ey a nenga di firma e decreto pa por a paga pa e banderanan y ora nos Consehero General a discuti cune riba e asunto aki el a saca Betico Croes for di sala di Bestuurscollege y prohibi’e di atende e reunionnan. E ora ki haci? Aki Betico a mustra su cualidad y abilidadnan unda e mes a hipoteca su cas pa haya placa pa trece e banderanan for di Boston. Y e mayoria di e banderanan awe den feliz memoria Mai Lacle a bay Colombia y bin cu nan. E problema e tempo ey tabata cu Gobierno Antiano y di Hulanda no tabata contento cu Aruba a bin cu su propio himno y bandera.
Dia 18 di maart 1976 nos a marcha for di Bestuurskantoor, cana bay e tempo ey te Wilhelmina Stadion cu awe yama Compleho Deportivo Guillermo Trinidad. E decretonan pa nos himno y bandera a ser lesa pa e Secretario di Eilandsraad y Bestuurscollege sr. John Booi. Como diputado cu a defende nos himno y bandera, mi por a hiba un discurso. Dos hoben a hisa nos bandera y e tempo ey Joy Kock y sra. Maybelline Arends Croes cu orkesta Filharmonico a toca nos himno.
(E ta sigui…)
