Awe tardi autoridadnan di salud di nos pais a tuma decision pa cera consultorio di Dokternan di Cas, esta Dr. Boderie, Giel y Wever. Motibo ta cu un di e dokternan aki, specificamente dr. D. Giel, ta e di tres pashent di Aruba contagia cu Coronavirus. E hunto cu su pareha a pega cu e virus durante nan vakantie na New York. Pero, ta parce cu e Dokter a faya den cumpli cu protocolnan existente y awo a hinca su coleganan y tur e pashentnan di e consultorio den un inconveniencia masha grandi!
E dokter, a sabiendas cu su casa ta malo y despues a presenta sintoma di Coronavirus, a opta pa sigui traha normal sin problema. Su pareha a hasta hiba yiu scol! Su coleganan ta tum’e na malo pa no a sigui protocol y tuma medidanan di prevencion, a sabienda cu Bo casa tin sintoma di Coronavirus y bo sa cu boso a caba di bishita New York!
Awe tardi a cera e consultorio y a manda e dos demas Dokternan cas tambe bou cuarentena, mescos ta e demas personal administrativo di e consultorio. Tambe awo lo manda yama pashentnan cu a bay un bishita di Dokter e ultimo simannan aki pa haci test.
Di un banda ta bon cu ainda no tin Coronavirus na Aruba pasobra tur tres caso ta importa for di New York. Pero cu un Dokter di cas infecta, e chens cu e por a pasa e enfermedad na un of mas pashent di dje ta grandi. Esey e investigacion y testnan lo mester revela.
Ta bon pa señala cu e practica aki no por wordi mira como un “eror” of un simpel “fayo”. E tipo di asuntonan asina ta aparece den bos Codigo Penal y tin hasta castigo di prizon mara na e hecho aki. Tanto Dr. Giel como su pareha ta na cas den cuarentena.
