Diaranson ultimo Parlamentario Tromp-Lee tabatin e honor di cera conoci y combersa un rato cu sr. Mario ‘Mayon’ Arends. Sr. Arends ta presidente di Lever Stichting Aruba.
Na 2014 sr. Arends a bira malo y despues di hopi bishita na dokter y testnan a keda constata cu e tin problema cu su higra. Su situacion a keda bay atras te cu na final di aña 2015 dokter ta informe cu e unico solucion pa sobrevivi ta un transplante di higra.
Segun parlamentario Tromp-Lee e noticia aki sigur mester a bolter bida di sr. Arends boca abou mirando cu un transplante di higra no por wordo haci aki na Aruba y no ta keda cubri tampoco pa AZV.
Esaki echo aki a trece cu ne cu sr. Arends mester a tuma e decision drastico pa bay biba na Hulanda y na maart 2016 a haci esaki tambe. E aña ey mes sr. Arends ta logra haci e transplante necesario. E trayectorio pa el a yega te na e operacion aki sigur no tabata uno facil pero awe, 2 aña despues di e operacion, sr. Arends ta bek na Aruba cu un meta pa duna informacion, cooperacion y coordinacion na tur cu ta of por bay pasa den algo asina.
Sr. Arends a lanta Lever Stichting Aruba cu e meta final pa logra cambia ley di AZV pa tur hende na Aruba tin mesun derecho pa haya e atencion ora nan ta bay otro pais pa nan salud.
Mirando e echo cu parlamentario Tromp-Lee tin un bon amigo cu ta den e mesun situacion actualmente cu sr. Arends algun aña atras, e ta compronde e impacto cu e malesa aki tabatin ariba sr. Arends su bida. Segun Tromp-Lee cu bo mester atende cu bo salud den e casonan aki ta algo hopi grandi caba y tin un impacto ariba henter e famia. Y ora adicionalmente bo mester kita di trabou, bende bo cas etc etc. pa bo bay busca bo salud cu e speransa cu bo ta logra subi e lista pa un transplante ta algo hopi drastico.
Segun Parlamentario Tromp-Lee den e momentonan ey e ta convenci cu nos fe den Papa Dios y e speransa cu esaki ta duna bo, banda di e sosten familiar y di bo circulo di amigo ta loke ta duna bo e forsa pa lucha pa bo salud.
Sra. Tromp-Lee ta urgi comunidad completo pa like y share e page di Lever Stichting Aruba y di es manera aki keda informa di nan plan y actividadnan. Alabes haya sa tambe con nos tur lo por yuda nan. Como Parlamentario sra. Tromp-Lee a ofrece su sosten y yudansa na sr. Arends y mas cu claro na e Stichting cu e ta representa.
