Den combersacion cu Minister di Finanza Xiomara Maduro, el a sigura cu pa aworaki e pueblo di Aruba lo no mira un BTW (Belasting Toegevoegde Waarde). Ya caba tin e BBO na frontera cu ta dunando resultado similar cu na e BTW.
Den tur e dianan aki por a tende informacion di aspectonan financiero di Aruba. E pregunta cu tin na e momentonan aki ta si tin mas medida, mas belasting nobo na caminda. “Aruba no ta bay conoce BTW na e momentonan aki. E pais a caba di conoce un reforma fiscal unda cu a introduci BBO na frontera y e sistema ey ta trahando..
E mandatario a splica cu pa motibo cu tin e BBO na frontera caba lo no bini un BTW. A informa no solamente Secretario di Estado Alexandra van Huffelen pero tambe e hunta encarga cu supervision financiero y parlamento di Aruba.
Tur loke cu mester haci ta hinca den Landspakket, y tambe e reformanan fiscal cu a palabra. Berdad a papia di BTW pero esun cu a yega finalmente na dje tabata e BBO na frontera. E tin casi mesun efecto. Riba e parti fiscal, falta pa fortifica funcionamento di Departamento di Impuesto. E ta algo interno cu mester haci adaptacion na dje. A digitalisa gran parti di e sistema interno y lo sigui den e periodo nos dilanti. Otro aspecto importante cu lo sigui traha riba dje ta e cumplimento. Tur esaki lo tin atencion di gobierno den e periodo nos dilanti.
