Na Universidad di Aruba ayera a tuma luga e apertura oficial di e edificionan di Maria Convent, caminda lo ubica e facultad di Sustainable Island Solutions through Science, Technology, Engineering and Mathematics (SISSTEM). E ceremonia a tuma luga den presencia di S.E. Gobernador Alfonso Boekhoudt, Minister President mr. Evelyn Wever-Croes, Minister mr. Geoffrey Wever, Minister Endy Croes, Minister mr. Xiomara Maduro y Embahador di Union Europeo Rene Van Nes, tabata algun di e dignatarionan presente.
E apertura di e facultad SISSTEM ta un logro grandi pa e futuro di educacion na Aruba cu e posibilidadnan cu e facultad nobo ta ofrece. Tambe e ta añadi na esfuersonan pa revitalisa Oranjestad den un ciudad moderno y mas dinamico. Studiantenan, ambos local y internacional lo tin acceso na programanan di bachelor y master na un nivel mundial, traha door di e renombra KU Leuven di Belgica.
Diversificacion economico ta un meta clave pa Aruba y esaki ta rekeri pa nos adapta un sistema di “Knowledge Economy” – Economia di Conocemento. SISSTEM lo hunga un rol crucial den e desaroyo di un economia sostenibel basa riba conocemento.
Minister Wever, cu ta actua como Territorial Authorizing Officer (TAO) pa e proyectonan di Union Europeo, a enfatisa e balor inmenso di esaki pa nos pais. “E progreso di Universidad di Aruba lo tin un impacto positivo grandisimo riba nos comunidad. E educacion avansa cu lo ser brinda lo prepara nos studiantenan pa e retonan di futuro y ta contribui na un Aruba mas sostenibel y innovador”, segun e mandatario.
Minister Geoffrey Wever a menciona y a indica di ta sumamente satisfecho, y a gradici e Comision di Union Europeo pa e financiamento cu a haci esaki posibel. E renobacion di e edificio historico di Maria Convent a tuma luga den colaboracion cu United Nations Development Programme (UNDP) y e contratista local Albo N.V. E trabounan di renovacion a resulta den un espacio cu ta cla pa ricibi e generacion nobo di studiantenan di SISSTEM.
Gobierno di Aruba ta expresa nan gratitud profundo na tur e partnernan, incluyendo Universidad di Aruba, Union Europeo, UNDP, KU Leuven, y Albo N.V. pa nan esfuerso y dedicacion pa realisa esaki. E apertura oficial di Maria Convent y e facultad SISSTEM ta un testimonio di kico por logra door di colaboracion y vision pa un Aruba mas avansa y sostenibel.
