E situacion di suministro di coriente na Aruba ta birando un preocupacion pa mayoria. Por ehempel e luna aki, mas cu binti biaha coriente a bay mientras apenas cu nos ta riba e di bintitres dia di luna di mei. Pueblo a cuminsa fada y ta hostina di e situacion. Ya ta un siman cu Minister di Energia, Glenbert Croes a priminti cu lo informa pueblo riba un posibel solucion.
Con e ta premira di haci esaki, ta un siman cu el a manda busca un grupo di Merca pa haci un investigacion den ELMAR y asina informa pueblo kico ta e situacion. En fin, un siman a pasa y no a tende nada mas di e minister. Por ehempel, diahuebs marduga, coriente a bay como tres biaha.
Mirando cu e minister no a sali y informa pueblo di e resultado di e investigacion, a dicidi di busca director di Utilies Aruba, Anthony “Ton Rojer. Rojer ta politicamente nombra den e funcion door di minister pa partido MEP.
A topa cu e director na su salida pa un lunch break pafo di oficina di Utilities Aruba. No obstante e presion inmenso cu tin den pueblo y e preocupacion pa e suministro di coriente, e director a haya ta bon di no duna ningun comentario riba e situacion. Ora a acerc’e pa un reaccion, el a contesta bisando: “no comments” y asina a subi auto y bandona sitio.
Ta spera cu pronto, e minister encarga tuma pasonan responabel p’asina pueblo no sigui sufri mas bou di e situacion. Tur esaki mientras cu e gobierno di MEP y RAIZ a aumenta coriente cu 30% durante nan gobernacion y djey bah’e cu 7%. Pues, utilidad ta un di e gastonan mensual mas grandi p’e digno pueblo y asina mes no ta ricibi un servicio drechi. Lo pio ta cu tin un solo compania ta brind’e servicio, pues un monopolio y sin cu por haci nan trabou na un forma drechi p’e pueblo.
