Durante conferencia di prensa di MEP, lider di fraccion drs. Shailiny Tromp-Lee, a menciona dos tema basta al caso y cu ta den boca di pueblo n’e momentonan aki.
E prome ta caso Ibis, unda cu ex-minister Paul Croes di AVP a perde su caso den cassatie y tambe caso Kwihi, un caso nobo, cu tin dos ex-politico di MEP inclui.
Tromp-Lee a comenta cu caso Kwihi a cuminsa diaranson cu a pasa, unda cu Ministerio Publico a suministra e informacion na pueblo. Tin masha tiki informacion riba dje, e politico a menciona. E ta un caso den su fase inicial y bao investigacion. Den transcurso di tempo lo haya sa kico lo bira e acusacionnan, dado caso cu esaki resulta asina.
Segun Tromp-Lee partido MEP ta para pa integridad, bon gobernacion, ta coopera pa cualkier investigacion cu tin cu tuma luga.
Mirando cu MEP ta para p’e aspectonan aki, tin di bisa cu cualkier iregularidad cu tuma luga, cu haci pa miembro of ex-miembro di partido MEP, e punto ta cu tin cu responsabilidad.
“Bo comete un iregularidad, bo tin di responsabilisa p’e.” Ta algo cu MEP ta para p’e como partido.
Pero na mes momento, como politico, Tromp-Lee ta haya situacion di caso cu ta keda bin riba mesa, cual ta algo hopi preocupante.
E politico ta indica cu e ta kibra e confiansa cu pueblo mester tin como politico. E ta accentua e stigma caba cu tin contra e politiconan, cu tur politico ta ladron, cu tur politico ta comete fraude, cu tur politico ta den e area politico pa beneficia su mes personalmente y esey Tromp-Lee ta garantisa cu no t’e caso.
