Awe mainta Aruba Ports Authority N.V. a yama bonbini na e crucero Seven Seas Mariner, cu a drenta waf di nos isla pa prome biaha. Gerencia di APA a bisa di ta spera cu esaki ta prome den hopi bishita di e liña crucero aki. El a sali for di Sint Maarten riba dia 1 di november mientras su ultimo biahe ta sali dia 10 di november, ora e yega Miami.
Seven Seas Mariner ta opera pa Regent Seven Seas Cruises, conoci antes bou di Radisson Seven Seas Cruises. E tabata e prome “All suite-All balcony ship” na mundo y a gana e premio di “Ship of the Year” na aña 2002 dor di Ocean & Cruise News. Ta bon pa enfatisa cu e barco aki tabata e prome na mundo pa ofrece cena di e famoso ”Le Cordon Bleu of Paris” den un di e restaurantnan abordo.
E crucero ta registra na Bahamas y ta nabega desde aña 2001. E ta midi 216.1 meter di largura, 28.3 meter di hanchura y cu 8 piso. Tin capacidad pa 700 pasahero y 445 tripulante.
