Aña pasa na luna di october, SETAR a participa den un proceso di bid hunto cu 21 otro compania local y internacional pa e proyecto di ‘Video Surveillance System’ di Aruba Airport Authority N.V. (AAA). SETAR hunto cu e compania di camaranan avansa Avigilon hunto cu otro partnernan a resulta ganado di e proyecto grandi aki.
Remarcabel ta pa menciona cu esaki ta un di e proyectonan di mas grandi cu SETAR a logra. E ‘Video Surveillance System’ ta un sistema moderno cu mas di 300 camara di varios tipo instala paden y pafo di AAA. E camaranan special aki ta programa cu e ultimo software pa brinda un visibilidad maximo. Asina aki aeropuerto por mehora su servicio y e siguridad di pasaheronan, pues tanto turistanan como localnan biahando y e empleadonan cu ta traha den Aeropuerto Internacional Reina Beatrix.
Despues di varios luna di trabou unda cu varios colega, certifica pa Avigilon, a traha den oranan di marduga haciendo trabounan di preparacion y instalacion, awor SETAR a haci entrega di e proyecto completo oficialmente na aeropuerto.
Como SETAR, nan ta orguyoso di por entrega un proyecto di e magnitud aki. Cu esaki SETAR ta demostra cu, banda di e servicionan tradicional cu nan ta ofrece, cu tambe nan ta ofrece otro tipo di productonan di calidad y cu garantia.
