Polis a presenta cu urgencia den Sero Patrishi riba diadomingo atardi laat alrededor di 6:30 pm p’un auto coriendo hopi malo. E tabata core di un forma cu e tabata crea peliger pa su mes y tambe pa demas automobilistanan.
Parce el a hasta accidenta y hasta a ranca un meter di awa. Polis a topa cu e vehiculo marca Suzuki modelo Swift color shinishi para memey caminda dilanti di su cas den Sero Patrishi. E auto ta pertenece na e conocido di husticia, Sergio Peña, cu ta biba net na e cas eydilanti.
Locual cu a resalta tambe ta cu e windshield tabatin perforacion di bala. A puntra p’e na e cas pero e no kier a sali of nan a bisa cu e no t’ey. Pa mas investigacion, polis a opta pa confisca e auto y hib’e ward’i polis. No ta conoci si awe a tira riba dje of si e perforacion di balanan ta bieu. Den casonan asina bo nunca por sa si ta nan a tira di pafo riba e auto of si ta e chauffeur mes a los tiro for di paden. Tur e tipo di scenarionan asina e ekipo di polis forensico lo mester investiga awor.
Asina por mira cu un simpel accidente, awor a bira henter un investigacion forensico pa sa kico a pasa. Ultimo dianan aki a haya hopi yamada di ciudadanonan cu ta informa autoridad cu nan ta scucha tiro cerca di nan cas. Ta parce cu tin un tendencia di “drive by shooting” pa cual e tipo di casonan asina di autonan cu perforacion di bala, awo ta haya prioridad di e defensornan di ley.
