Ser humano por contagia otro cu coronavirus nobo

2198

Tin un preocupacion grandi cerca Organisacion Mundial di Salud pa motibo di e casonan di coronavirus cu tin actualmente na China, unda varios morto a cay. E miedo ta cu esaki por plama hopi rapido pa resto di mundo.

Na Aruba mes tin un virus andando for di final di aña pasa unda cu e pashentnan ta keda afecta pa varios luna largo.

E coronavirus cu a cuminsa manifesta su mes den luna di december na e ciudad Wuhan na oost di China, por pasa entre hendenan, asina autoridadnan di China a informa dialuna. Diescuatro dokter a test positivo pa e virus. Den dos di e casonan a keda comproba cu e contaminacion a tuma luga entre hende, un hende a pase pa otro.

Ta papia di 217 casonan registra y comproba di a keda afecta pa e virus. Tres persona a fayece.

Pero den e fin di siman tras di lomba, casonan di coronavirus a keda detecta den diferente otro ciudad di China. Tambe pafo di China e ta keda aparece mas.  

Organisacion Mundial di Salud (WHO) a adverti pa un posibel plamamento mundial di e virus. Autoridadnan di salud rond ta trahando pa evita cu e ta plama. Autoridadnan di China a bisa cu nan ta hincando tur esfuerso den un campaña di conscientisacion pa pone bida y salud di e hendenan como prioridad.

Sinembargo tin hopi cos no mucho cla di e virus aki. E sintomanan di coronavirus por varia di un verkoud te cu un forma di infeccion pulmonar cu por ta un peligro pa bida.

Pakico un noticia asina ta haya asina hopi atencion, si e cifranan ta chikito? No mester lubida cu miyones di Chines ta biaha rond mundo. Si menos cu un porciento sali cun’e for di e pais, e por ta un peligro grandi pa resto di mundo.

E virus aki ta parecido na SARS, cu na 2003 cu a bula for di vleermuis pa sernan humano. E tempo ey un di cada dies persona infecta a fayece. De bes en cuando virusnan por pasa di bestia pa ser humano ora cu e contacto ta hopi estrecho. Den e caso aki ta parce cu e contaminacion lo a tuma luga na un mercado local unda cu ta bende pisca y bestianan bibo. Mientras tanto tin dos biahero infecta kendenan no tabata na e mercado ey.

Esnan cu tin e virus aki ta haya nan mes confronta cu rosea cortico, keintura y dolornan pulmonar. Por surgi un infeccion di pulmonnan. Principalmente cerca esnan cu tabata sinti nan mes malo caba. E sintomanan cu e Chinesnan ta describi awo, ta mustra menos peligroso. A desaroya testnan cu por detecta e virus nobo. No tin un tratamento pa e virus pero si pa e problemanan cu pulmon.