Gerencia di Parke Nacional Arikok a acerca sindicato SEPPA pa un reunion caminda cu nan a haya informacion cu nan lo bay acerca e trahadonan pa entrega di 40% di salario of arbeidsheid verkorting pa asina cumpli cu e tema di Loonsubsidie.
Den luna di december tabata tin un reunion caminda cu a saca un memo pa e trahadonan firma pa haci un peticion pa loonsubsidie. Aparentemente nan lo a acerca SVb of gobierno y mustra cu nan tambe a hiba un perdida di entrada. Motibo cu nan ta haya como dunado di trabao of empresa, ta cumpli cu e rekisitonan pa haya un loonsubsidie.
Pero pa haci un peticion pa loonsubsidie e trahadonan mester firma pa esaki tambe. E tempo ey SEPPA a haci peticion. Ta ricibi un subsidie for di gobierno pa loke ta gastonan entre nan salario di trahadonan.
Sa cu Parke a tuma mas trahado den servicio y tin un par di esakinan cu no ta cay bao di subsidie di gobierno, of ta cay den e entrada cu Parke ta ricibi for di entrada di turista, promocion di Parke mes, etc.
E ora a haci un pregunta, con tin pensa di haci cu loonsubsidie. Parke a contesta cu unico cos cu ta pidi e trahadonan ta pa coopera, firma e formulario di loonsubsidie. Lo no tin ningun consecuencia pa nan condicionnan di trabao. Por corda cu den december, hasta nan a rabia cu casi no a tribi di haci pregunta mes, Brito a bisa.
Manera cu por mira, na januari e prome consecuencia ta cu pa sigui cu e proceso di loonsubsidie nan kier pa e trahadonan firma cu nan ta bay di acuerdo cu nan ta bay 40% atras den nan entrada.
Esaki ta un sla hopi duro pa trahadonan di Parke. No ta asina cu nan tin salarionan barbaro tampoco, manera cu nan por bay afford awor aki, hunto cu e entrega cu nan ta haciendo caba, hasta bay 40% atras di nan entrada. A bisa Parke esaki di inmediato. SEPPA conoce e trahadonan aki pa hopi aña. Sa cu hopi di nan ta biba net net cu e entrada cu nan tin. Cu e informacion cu awor aki nan tin cu bay entrega 40%, despues cu a convence nan pa bay firma e formulario di loonsubsidie pasobra no lo tin consecuencia di nan salario, mester consulta cu nan bek. Awo cu e informacion aki mester bay bek cerca nan. Ora cu haya e informacion aki, SEPPA lo tende di e decision cu e trahadonan lo tuma.
Locual cu por a tende di e reunion ey, trahadonan a rechasa totalmente e peticion di Parke pa bay atras 40% di nan salario.
Situacion financiero precario
Segun Magali Brito di SEPPA, Parke ta bisa cu e ta un proposicion di nan, esta e 40%. Ora cu ta den e discusion aki ta compronde cu en principio kisas si bin cu un proposicion den menos tempo, nan por a hasta acept’e.
Di otro banda, di parti di Parke, nan lo kier bin cu un retiro boluntario, esta un tipo di pakete pa esnan interesa. Kisas esaki lo ta atractivo pa personanan di edad halto. Despues di algo asina por mira si mester tuma mas medida of no.
Djey por sigui wak e ora, si mester sigui tuma mes medida of no.
