Ta tristo pa constata cu e werksternan di SKOA ta bibando bou di un tension enorme y menasa continuo ya cu cada biaha nan tin cu tende cu e ‘cachi cachi’ di salario ta na peliger. Esaki pa mal maneho di ken?
Segun declaracion di e Minister di Enseñansa saliente, gobierno anterior no tabatin mag di a tuma e decision pa duna e werksternan e derecho riba premies. E no ta sali afo bisa “ami ta kit’e”, sino e ta obligando SKOA si pa indirectamente tuma medida si. Y tur hende ta wak cu SKOA ta tir’e riba e werksternan.
Tambe segun Lampe, SKOA como dunado di trabou tambe hunto cu e ‘otronan’ como representante di gobierno a comete atraco al estilo Robin Hood ya cu SKOA a duna e trahadonan humilde un miho salario y otro derecho, p.e. premies mescos cu otro werkster den gobierno. Cu un e-mail circulando rond ey, discusion habri y sincero, y aña largo di lucha di e werksternan, hasta e discurso a cambia y awor a bira un atraco.
Gobierno tabata parti di tur discusion anterior y manera SEPPA a bisa tur momento “si tin algo a bay robes den e ehecucion, corigi esaki!” Pero con por ta posibel cu ta bandona e principio di igualdad cu e partidonan, gobierno tambe, a defini como base pa construi e acuerdo ta wordo bandona. Si e gobierno actual, obviamente no e minister saliente, kier busca forma pa soluciona e problema, tambe ta malo.
Pa niun hende e ta interesante si tabata cu e figura di e minister saliente si of no, importante ta e lucha y e acuerdo. Y si e punto ta cu gobierno no a regla e decision corecto, mester drecha esaki. Y no keda hinca e grupo di trahado humilde aki cu un hangua frustra y en bes di soluciona e problema ta keda pusha veneno y insisti pa SKOA kita e pan di e werksternan.
Ta parce cu awo hunto cu grupo di docente y otro den enseñansa cu durante casi 4 aña a wordo maltrata no tabata suficiente pa e Minister di Enseñansa saliente. Hasta den vakantie e grupo aki di werkster no por tin trankilidad pasobra nan ta wordo molestia, cansa y tension.
