Contrario na publicacionan di algun medio, e señora cu nan a hiba na un forma inhusto atrobe for di cas di Minister Paul Croes, a resulta di tin su papelnan na ordo. E señora ta completamente legal y ta den libertad.
Mientras tanto Ministerio publico, despues di 5 luna di a realisa un huiszoeking na cas di Sr. Croes a bin busca e Minister pa interogacion y asina duna su persona e oportunidad di defende su mes, si en caso bin un caso dilanti.
Sra Mr. Marije Vaders kende ta abogado di Sr. Croes a declara anteriormente cu e ta puntra su mes si Sr. Croes lo por realmente haya un fair trial despues di tanto luna di acusacionan serio den su direccion sin por a defende su mes ni un dia. Den e relato di Prensa OM a bolbe informa cu Sr Croes no por ricibi documento di su caso, loke ta bolbe trese duda den henter e proceso su legalidad y husto.
Den e dianan nos dilanti lo skucha kiko ta e intencionan di OM y kiko ta e supuesto pruebanan cu nan lo tin contra Sr Paul Croes.
