Durante eleccion di Reina di Aruba su carnaval 66 a sosode un caso lamentabel. Tabata na momento cu tur hende tabata den espera pa e resultado, cu por a scucha hopi gritamento y hendenan yen di susto ta pidiendo pa ayudo pasobra un señora cu tabata trahando den e actividad, pa ta exacto e parti di baño etc, a sak den otro.
Ambulance a yega na e sitio y a cuminsa traha mesora cun’e, a dun’e CPR, pero parce e no tabata dunando resultado. Asina mes a dicidi pa bay cun’e urgentemente hospital mientras cu a sigui dun’e CPR.
Yegando na Eerste Hulp a constata cu no por haci nada mas pasobra e no tabata reacciona riba e intentonan pa rebiba e curason.
Ta trata aki di Erilas Têtè Heureuse, naci dia 15 di maart, 1942.
“E tabata un señora masha fuerte mes y semper cu un sonrisa riba su cara,” tabata e comentario cu a ricibi di varios persona ora cu a haya sa cu el a fayece. Famia tabata tur kibra, pasobra pa algun dia caba nan tabata preocupa p’e.
E señora di 77 aña aki ainda tabata traha pa haya un tiki entrada mas pa cubri su gastonan. El a tuma e sidejob manera esun di laba baño na Carnival Village. Pa algun dia caba e tabata sinti malo, y tabata saca basta. Diasabra famia a papia cun’e y a bis’e miho e no bay traha, pero el a bisa cu e no por laga e hendenan na caya y e mester di e placa. Tur cos a bay bon y ora cu el a yega na e baño di hende homber. El a bira malo y tabata saca. Mesora a bati alarma.
Famia a haya susto pasobra nan tabata siguiendo e evento LIVE y a bin tende di e señora cu a bira malo y asina a bin haya sa cu Erilas Têtè Heureuse a fayece.
Paz na su restonan y forsa na famia.
