Tratando pa haya hobennan interesa den e profesion di tecnico di airco, e compania local Air Tech a organisa un seminario specialmente pa hobennan di Educacion Profesional Intermedio (EPI), cual a tuma luga diamars ultimo.
Diamars ultimo, dia 5 di november, a tuma luga e seminario di e compania AirTech Aruba, cu tabata specialmente pa tur tecnico en particular esnan cu ta traha den e ramo di drechamento di airco y naturalmente pa e studiantenan di EPI sector tecnico. E seminario aki a tuma luga na Colegio EPI den oranan di atardi, presenta pa e representante di e compania York for di Merca, Cesar Quiroz, specialisa den ramo technico, kende a bin pa haci un refreshment course cu a asisti e seminario.
Segun Pierre-Luigi di Vecchia (di AirTech), e seminario a bay super exitoso parti mainta. E hobennan tabata tin hopi interes. Na final di e seminario a reta un di e studiantenan cu si e logra start e airco manera a duna e seminario, e lo ricibi e airco gratis, cual el a haci’e y tur cos a bay super bon mes. Y awo e ta doño di un airco.
E seminario parti anochi tambe a bay hopi bon cu hopi interes. Hendenan cu ta instala airco ta interesa pa sa mas di e sistema nobo cu tin awendia. Segun di Vecchia, nan tin e minisplit unit cu tin riba mercado ya pa 6 luna. Pero diamars, a dicidi di lansa e liña nobo cual ta di York, di e sistemanan comercial. No solamente nan ta dedica na airconan pa cas, sino pa negoshinan tambe.
Airtech ta un compania cu a lanta door di bende piesanan di airco. Nan ta consciente con hopi importante e piesanan ta. E marca York, Daizuki, Boreal, nan ta bende tur nan piesanan, cu nan tin den stock. Di Vecchia ta gradici rector Maduro, sra. Danker, meneer Randy Tromp y full su ekipom pa duna e oportunidad pa bin haci e seminario na EPI.
Studiante Juan David Solano ta den su ultimo aña di Electrotechniek y el a asisti na e seminario aki. Apart di loke a splica durante e seminario di kooltechniek, tambe a splica di e parti di detaye y cambionan nobo cu awendia e airconan tin.
E ta sigui conta cu e seminario aki ta pa no keda atras di loke ta pasando awendia y yega na stage y haya cosnan nobo. Te ainda e base cu nan ta siña ta un tiki anticua y cu e conferencia aki sigur nan por update hopi. E mes ta desea di sa mas di airco of di cualkier otro compania di instalacion y/of tambe tecnico.
Juan David ta haya e presentacion hopi interesante. A spera e presentacion na Ingles, pero a hay’e na Spaño. Ta detayenan chikito, pero e informacion suministra tabata hopi importante.
