E website Cruise Fever a puntra su lectornan cua wafnan di crucero den Caribe y Bahamas ta nan faborito y cua ta menos. Riba e lista aki e resultado directo di e contestanan n’e pregunta aki fo’i centenares di siguido dispuesto pa expresa nan opinion. No tur waf di crucero ta mescos. Y cu e popularidad di biahe riba crucero den Caribe y Bahamas, tin algun destino mas popular cu otro.
Tin di señala cu ta trata di un tema hopi obhetivo. Mientras cu algun ta prefera pa keda riba barco ora cu nan ancra na Nassau, por ta cu abo lo ta encanta pa explora e puerto aki.
Cinco di e wafnan crucero faborito
E waf di crucero mas menciona den e categoria di “faborito” p’e lectornan di Cruise Fever ta:
- Sint Maarten
Cu un parti Frances y e otro Hulandes, e isla aki di 13 miya cuadra ta un di e wafnan di crucero mas concuri di e lista aki. Es mas, e waf di Philipsburg, na Sint Maarten, a ricibi por lo menos 1,3 miyon turista crucero aña pasa, cu casi 500 barco para den e waf.
E turistanan crucero ta encanta ora cu tin asina hopi cultura den e zona como tambe e beyesa natural. E isla ta conta cu 37 beach y segun algun fuente, e tin e record di beach pa kilometer cuadra.
Sint Maarten tabata e waf di crucero faborito mas menciona y mientras cu mas itinerario di crucero ta inclui e waf di escala aki den nan programa, mas turista crucero tabatin e oportunidad pa explora e pida chikito aki di paraiso.
- Aruba
Aruba, un di e luganan faborito di e itinerario di crucero den Caribe Zuid, ta e mas conoci di e islanan ABC. Lo bo haya den e waf aki di escala parada di duracion di 6 pa 12 ora den hopi caso. Mirando cu e isla ta hopi den zuid, den lama Caribe, ta rekeri un biahe mas largo p’e barconan cu ta sali fo’i Miami y Fort Lauderdale.
E turistanan crucero ta adora Aruba pa su beachnan cu santo blanco, e herencia Hulandes cu ta presente den e isla y e sensacion di siguridad cu por sinti aki. Aruba ta un di e wafnan di escala mas sigur. Si na esaki tin di añadi e centronan comercial magnifico di Oranjestad y e un sin fin di excursion unico, lo bo compronde pakico Aruba ta riba e lista aki.
- Grand Cayman
Cu cerca di 1,4 miyon pasahero crucero cu ta bishita Gran Cayman tur aña, e ta un di e wafnan mas popular di Caribe. E turistanan crucero sa duna bon comentario riba Seven Mile Beach of di e impresionante coral cu ta rondona e waf, perfecto pa practica snorkel y submarinismo.
George Town tambe ta ofrece hopi oportunidad pa bay di compras. Y no mester lubida un di e actividadnan turistico mas popular di e isla: Cayman Turtle Centre.
Grand Cayman ta un di e tres islanan Cayman y ta situa mas of menos 160 km west di Jamaica y zuid di Cuba.
- San Juan
San Juan, Puerto Rico ta un waf faborito. Viejo San Juan y vibrante cultura cu por inhala den su cayanan tin algo special. E turistanan crucero ta encanta cu mayor parti di e zona aki por explora na pia y cu e beach di mas bunita, manera Playa del Condado y Playa El Ultimo Trolley ta ofrece hopi espacio pa relaha bao solo.
Na San Juan, tambe por saboria un cuminda fantastico cu un mescla di sabor Spaño y Caribeño. E wF aki tambe tin un historia unico. El Morro ta un forti di seis nivel cu ta domina e bahia di San Juan y construi durante siglo XVI.
- Corsou
Otro isla Hulandes di Caribe, e C di e islanan ABC, ta conoci pa su rifnan colorido y beachnan impresionante. Willemstad, e capital, tambe ta un atraccion popular di e waf. E edificionan vibrante di estilo colonial, ta ofrece un backdrop precioso pa keiro yena cu tienda y cafe, como tambe ta bon pa warda un luga den e stima pa dal un keiro den e centro.
E turistanan crucero ta encanta e ambiente relaha di corsou, hunto cu e beyesa natural di e isla. Excursion door di Parke Nacional Christoffel tambe ta hopi popular pero e ta un ora leu di e waf.
Mencion destaca:
Sint Thomas, Boneiro y ‘cualkier isla priva.’
Esunnan menos faborito
E echo cu un destino crucero ta riba e lista aki di esunnan menos faborito, no ta nifica cu bo no por disfruta absolutamente di un dia increibel den e waf.
Pero a menciona e wafnan di Caribe y su alrededor como esunnan menos faborito. Di acuerdo of den desacuerdo, por ta e wafnan aki tin e margen di mehoracion. Porcierto, ya algun a haci mehoracion grandi, na cual no mester descarta.
Nan ta: Nassau, Freeport, Jamaica, Belize y Tortola. No mester lubida Martinique y Roatan, cu ta algun di e wafnan cu no a entusiasma e turistanan crucero, segun Cruise Fever. Tambe a menciona Cozumel (Mexico) tambe varios biaha como esun menos faborito, pero tambe a figura riba e lista di wafnan faborito di e comentaristanan.
