Secretario di Estado Raymond Knops, tabata na Aruba pa un bishita cortico, pero cu un agenda yen. Entre otro el a bishita, hunto cu Gobernador di Aruba, dos scol, como tambe el a papia cu diferente minister, como tambe fraccion di MEP y AVP.
El a splica cu e tabata contento di ta na Aruba despues di 5 luna. E programa tabata compacto, pero a tene bon combersacionnan.
E mandatario a splica cu e bishita aki e ta mir’e como un sosten na esnan cu ta compronde cu algo tin cu wordo haci, cual ta di vital interes na e futuro di Aruba, mirando e situacion economico di Aruba mester wordo mehora y keda atractivo pa inversion. Cu e debe di gobierno mester bira menos y pesey mester tin un overschot riba e presupuesto, sino esaki no ta realisabel.
Tambe a papia cu minister di husticia riba algun asunto, encuanto di e rechtshandhaving riba un cooperacion dentro di reino.
En corto, e tabata un bishita cortico pero basta pisa. E dos scolnan cu el a bishita, entre nan De Schakel y Filomena College na San Nicolas, cual a laga un bon impresion cerca dje. Cu esey el a ta convenci cu educacion na Aruba ta bon. Por a mira e alumno y docentenan, cu hasta den fin di siman, ta haci hopi pa asina pone e alumnonan riba un plano mas halto, cual p’e ta admirabel.
Knops ta sigui splica cu e mes tabata 12 aña largo como parlamentario y ta tene hopi na cuenta cu e papel di parlamento. E persona di contacto ta e gobierno di Aruba y e gobierno di Aruba mes ta percura pa parlamento mester wordo hiba segun e acuerdonan cu nan haci. Na e momento cu haci acuerdonan final, e ora ta asumi cu parlamento ta wordo envolvi.
Knops no ta bay actua riba e manera con e gobierno di Aruba ta envolve parlamento. A base di e combersacionnan cu el a hiba, entre nan algun parlamentario, cu ta dun’e un idea cu tur hende ta convenci cu algo mester sosode. Y cu parlamento ta hopi envolvi pa haci algo y naturalmente kier papia esaki cu gobierno. Esey si, no ta keda na Knops pa e bay bisa algo.
Knops a splica cu e tabata tin bon combersacion cu e prome minister, como tambe e minister di finansas y ta keda na nan pa palabra esaki internamente. E ta spera cu e puntonan cu a papia riba dje, cu esaki por wordo treci padilanti, por wordo comprendi den Parlamento y tambe haya sosten. Esey ta loke cu e secretario di estado a compronde di e otro combersacionnan cu el a hiba. Ta keda na e gobierno pa un biaha mas pa papia cun’e pa asina mira si por yega na acuerdonan definitivo.
