E evento Jota Joti ta un evento mundial di Scouting y ta celebr’e e di tres fin di siman di October na mundo door di gruponan di scout. Den e campus di Scouting Aruba a tuma luga e Jota Joti y instalacion di e directiva nobo.
E ta un forma cu tabata comunica cu otro via di e sistema di radio amateur usando “Jota” (Jamboree on the air) y tabata comunica cu gruponan di scout rond mundo. Esaki John Hessen, comisario internacional, ta splica.
Pero mundo a avanza y e sistema di comunicacion awendia ta diferente y el a bira “Joti” (Jamboree on the internet). Pues via di internet, un site special cu tin, e gruponan di scout rond mundo ta comunica cu otro.
Aki na Aruba a cuminsa diabierna ultimo, na momento cu na cierto parti di mundo tabata diasabra caba. Door di e diferencia di oranan, ta haya e situacion cu 24 ora pa dia tin miembronan di scout online ta chat. “Asina e muchanan ta cera contacto y amistad via di internet. Ora cu nan bay evento internacional, nan sa topa cu otro,” Hessen a splica.
Na mesun momento a instala e Hoofdbestuur di Scouting Aruba, cu ta sinta pa 3 aña. Mester bisa e directiva tin chens di prolonga nan trabou den directiva cu tres aña. Si nan kier sigui, mester laga un periodo pasa pa nan por drenta directiva bek.
E directiva nobo ta consisti di: Hoofd Comisario: Christopher Lake; Coordinador internacional John Hessen y e otro miembronan di directiva ta Hoofd Kwartier Entrenamento y Formacion (Lilian Hernandez); Comunicacion (Ariana Koolman Chirino); Programa (Maritza Carrion); y Finanza y Administracion (Ramphis Tromp).
E directiva tin un programa hinca den otro pa e proximo añanan cu e meta principal di crecemento di Scouting Aruba tanto den calidad como cantidad y crea lidernan hoben. Ta trahando riba formacion di e hobennan aki pa ta un bon lider.
