Diadomingo mainta alumnonan di Scol di Musica Rufo Wever bou guia di Hester Matthijsse, Rob Rijnbout, Ryan Maduro y Johnnie Croes a duna un presentacion na e Concierto Dominical den Biblioteca Nacional. E concierto a cuminsa cu e ensemble di fio bou direcion di Hester Matthijsse compaña riba piano pa Rob Rob Rijbout y sigui pa Carienne de Cuba riba piano cu a toca “Arubanita” di Rufo Wever compaña pa e alumnonan di fio.
Como solista riba piano, Ivan Ponson a duna un bunita interpretacion di e “Minute Waltz” di Frédéric Chopin. Justin Peña hunto cu su docente Ryan Maduro a toca den duo riba guitara dos obra clasico y como solista Justin a toca “Pabien na tur tata” (J.C. Padu Lampe)/wals, “Fiesta” (Rufo Wever)/Polka y “Preludio Criollo”(Rodrigo Riera). Aki algun siman Justin lo biaha pa Hulanda na unda e lo sigui cu su estudionan na ArtEZ Hogeschool voor de kunsten na Zwolle.
Pa termina e ensemble chikito di Scol di Musica Rufo Wever a toca “Sabrosita” (tumba) di Rufo Wever.
Johnnie Croes di Scol di Musica Rufo Wever ta gradici Mayra de Graaff, e comision Concierto Dominical Donny Lacle y Biblioteca Nacional pa duna e alumnonan e oportunidad un biaha mas pa por presenta den e concierto aki y tambe na e publico cu tabata aplaudi e alumnonan despues di cada presentacion. “Esaki sigur ta un gran estimulo y ta contribui enorme na nan desaroyo musical”.
