Cuerpo Policial Aruba ta den un situacion peculiar awo cu scarsedad di bala di pistool! E Polisnan cu tin, no ta problema, pero no tin mas municion pa Polisnan nobo cu lo mester subi caya proximamente. Un ke otro tin di haber cu e agencia nunca a entrega e balanan cu a paganan pe den pasado. Un persona cardinal ta hunga un rol escencial den e escandalo aki, cu awe ta cana banda di Minister Presidente como su Coordinador. Straño ta cu, apesar di e implicacion pa nos siguridad nacional, cu ainda Minister Andin Bikker no a instrui Ministerio Publico pa eherce un investigacion riba e asunto aki, den cual tin mas di 1 miyon florin den wega!

Bou maneho di Minister Arthur Dowers, a manda cumpra bala pa Polis na e compania Mastersports of the Caribbean di Kenneth Lacle, suficiente pa cubri e añanan 2014, 2015 y 2016. Na tur ta papia di mas o menos 1.3 miyon florin na bala “cayente” pa Polis. Esun cu a regla e compra aki ta e empleada di inicial A. Oduber cu awendia ta trahando como coordinador di Prome Minister. E mes a pasa tras di lomba di su superiornan pa regla un firma pa “akkoord voor uitbetaling” pa Departamento di Finansa di Gobierno paga e compania henter e suma adelanta!

Pero e balanan aki nunca a yega. Na dado momento Polis a cuminsa pone presion pasobra nan balanan ta cabando. Forsa e compania a core bin cu balanan balora na mas o menos 800 mil florin, faltando como mey miyon florin ainda na bala, cu te dia di awe, nunca mas a yega pa Polis. E coordinador di Gobierno awe a bisa cu “asina semper el a bay”, esta cu Gobierno ta cumpra y e balanan ta bin despues. Pero cu algun aña pasando bay caba, ta ki dia e balanan lo yega anto?

E asunto serio, cuestionabel y condenabel den e caso aki ta, cu ora e presion a subi, diripiente a bin “ordo di ariba” pa laga investiga e hefe di e departamento ey di Polis. A suspende e ehecutivo y no a laga Polis ni Landsrecherche, sino un compania priva, investiga e hefe supuestamente pa mal maneho. Pero nada a sali for di e investigacion, te cu Minister Andin Bikker a hay’e ta pone e hefe bek den funcion!

Pero mientras cu for di Cocoloshi ta percurando pa tur e maniobranan di panico aki, e balanan di Polis a caba. Parce cu a core fia di Landsrecherche y di Ministerio Publico. Tambe a acerca Cuerpo Policial di Boneiro pa eventualmente fia bala di nan mientras ta sperando pa e cargacion di bala yega Aruba.

E problema a presenta ora cu Gobierno a instrui Polis pa bolbe cumpra bala for di e mesun compania. Pero, Polisnan a protesta cu con por ta posibel pa cumpra bala di un compania cu debe pueblo 500 mil florin na bala cu nan a cobra pero cu nunca nan no a entrega!

Minister Andin Bikker como tal ta sinta cu un otro problema den su scochi pasobra siguridad nacional ta den peliger ora Polisnan tin scarsedad di material escencial pa traha cune. Por lo menos un Polis a comenta, den forma chistoso, cu no worry cu no tin bala pa pone den pistool, pasobra nos ta paga como 200 mil florin pa luna na helicopter pa bula den halto si!

Comments

comments