Durante un conferencia di prensa diaranson atardi, un comision di ciudadanonan di Piedra Plat pa papia di proyecto renobacion Ripoldo Croes Ballpark.
Leo Vrolijk, di e comision, a splica cu mas o menos 4 luna pasa un grupo di e bario hunto cu famia di Ripoldo Croes (dfm), a bini hunto pa mira kico por haci pa evita cu e veld aki ta sigui deteriora. Hunto cu un grupo di boluntario a pone man na obra pa na prome luga cuminsa haci e luga limpi.
E comision a haci un evaluacion di e trabounan haci y un di e prome proyectonan ta pa cambia henter e backstop, cual nan a realisa caba. Pero banda di esey mester drecha parti di e dak, e cushina y diferente otro cos mas sin papia di drecha e tereno mes. “Ta masha hopi mucha mes a yega di hunga riba e tereno aki. Ripoldo Croes a dedica mas cu 45 aña di su bida na e hobennan y deporte di baseball. P’esey nos no por laga e ballpark aki bay perdi,” Leo Vrolijk a bisa den e conferencia.
Esey ta e motibo cu ta haci un apelacion na tur ex hungado, ex coach y habitantenan di bario pa acudi riba diadomingo na e veld, ora cu e miembronan di e comision ta presenta pa traha riba e mehoracionnan na e centro deportivo. Pa mas informacion, semper por tuma contacto cu miembronan di e comision: 5616748.
Un di e personanan cu ta coopera cu e comision ta e comerciante Robert Nieuw. “E centro aki mester ta cla pa ofrece nos hobennan e posibilidad pa train, cualkier tipo di deporte. Haciendo uzo di e ballpark, nan ta bay haya e interes pa sigui practica deporte y hasta por yega mas, haya atencion di scoutnan. Si nan no tin e chens, nunca ta haya sa te ki nivel nan por yega,” Nieuw a bisa.
Tambe el a splica cu e ballpark tin un cura rond di dje, riba cual comerciantenan por pone nan propaganda pagando un suma fiho pa aña.