Diamars merdia, parlamentario di fraccion opositor AVP, esta mr. drs. Ryçond Santos Do Nascimento, a tuma momento pa comparti su punto di bista tocante tratamento di e presupuesto nacional, tanto esun supletorio di 2022, como esun di 2023. Sinembargo, su comentario no tabata riba e cifranan, ni tampoco si a cumpli cu e procedura corecto, pero mas bien a enfoca riba kico ta loke parlamentario y ministernan a scoge pa trece dilanti durante nan turno na palabra den e reunion publico cu a tuma luga tur dia siman pasa y e siman aki ainda. E hala su atencion miembronan di coalicion ta opta pa troce echo y sigui polarisa, sin ofrece solucionnan cu ta beneficio pa tur hende pareu y pa e pais.
Santo Do Nascimento: “Los si OM tin un bias of no; los di e pregunta si OM ta bezig cu un percepcion politico… loke nos a wak ta cu caso Avestruz a wordo completamente politisa pasobra henter siman nos tabata traha un presupuesto di Pais Aruba, pero no ta presupuesto tabata central, no tabata presupuesto tabata enfoke. E enfoke di gobierno tabata caso Avestruz, for di e prome dia, for di e prome charla, for di e prome tanda. Semper den e trayectoria aki, e enfoke tabata e parti politico, anto ta uza e rekisitorio di OM como prueba cu Benny ta culpabel y esey simplemente no ta berdad.”
E parlamentario a splica cu den un estado di derecho nos mester scucha e sospechoso tambe. Cu esey den mente, e ta puntra su mes kico ta bay pasa cu e defensa di Benny Sevinger pasobra OM a haya oportunidad di broadcast e rekisitorio, anto e ta haya cu pueblo tin e derecho di scucha e defensa di Benny tambe. Sin sa kico e defensa ta of kico precies su abogadonan ta bay bisa, pa transparencia den e pais aki y den un caso asina importante, cu tanto atencion riba dje, mester di transparencia total.
“Un cos nos mester siña di e caso aki y esey ta cu nos mester duna mas atencion na nos procedura, pasobra e proceduranan ta pone hende den problema. E procedura no ta locual nan mester ta; e procedura no ta sirbi e interes di e ciudadano aworaki. Pasobra si abo mester warda añas y añas riba un pida tereno, algo no ta bon. Anto e ora ey, nos como pais nos mester profesionalisa. Nos mester wak kico ta pasando cu nos aparato gubernamental.Nos mester wak unda nos procesonan ta faya,” asina e parlamentario di AVP a duna di conoce.
Partido AVP ta ferviente sostenedor di e ombudsman, pero como pais ta chikito, nos ta hopi polarisa. A comenta con el a sinta scucha tur betoog treci dilanti den Parlamento, pasobra e ta considera esey importante. “No ta pasobra bo tin otro punto di bista, nos no mester duna atencion y scucha kico e otro tin di bisa; anto esey mester cambia den e pais aki. No por ta asina cu bo ta bin cu un procedura of un ombudsman unda bo no tin un garantia cu e ommbudsman ey no tin djente; unda cu e ombudsman ey por haya influencia politico,” asina a expresa.
Un ehempel cu e parlamentario a duna di con un procedura politisa ta afecta e ciudadano ta e maneho di energia. Santos Do Nascimento: “Ora bo wak bo recibo di awa y luz, e momento aki no tira culpa riba guera na Ucrania, no tira culpa riba ningun otro hende si no un maneho politisa pasobra, si a hedge, e prijs ey tabata stabiel.”
