Siguridad riba lama ta bo responsabilidad. E dianan aki biento a bolbe lanta cabes. Media di noticia ta yen di ehempel di emergencia y naufragio riba lama. Abo piscado, con bon prepara bo ta pa casonan di emergencia riba lama? Bo ekiponan ta na ordo? Bo famia na tera tin informacion necesario? Abo of bo famia sa kico ta e stapnan pa tuma?
Den e serie di articulonan aki Santa Rosa kier enfoca atencion riba e aspecto di siguridad riba lama specialmente pa nos piscadonan.
Preveni pa no tin di lamenta:
Tur biaha cu tin caso di emergencia riba lama tin un costo mara cu esaki pa pais Aruba tambe. Un buskeda ta algo hopi costoso y cada rescate ta costa pais aruba miles di florin, sin papia di e costo haltisimo di susto, angustia of tristesa cerca famianan. P’esey ta importante pa tur piscado ta prepara pa evita cu tin casonan di emergencia y si acaso tin mes, cu esaki bay mas miho posibel. Mescos cu abo, piscado, no ta sali sin di antemano prepara bo armacion, abo piscado tin di prepara pa bo siguridad tambe.
Siguridad riba lama ta bo propio responsabilidad:
Abo y bo famia ta prome yama pa ta prepara y bon ekipa. Idealmente, claro, lo kier preveni mes di tin emergencia. Pero si tin emergencia, tempo ta crucial y mas miho prepara bo ta, mas halto e chens ta pa sali ileso. Riba lama, rondona pa peligro, coriente y biento, tur obheto ta plama y coy distancia rapidamente. P’esey ta crucial den un caso di emergencia pa bati alarma na tempo, tin informacion na man y actua responsabel.
Bo rol den preparacion:
Tin tres (3) punto clave den e proceso di emergencia riba lama cu abo y bo famia tin un rol hopi importante pa siguridad riba lama:
1. Prepara di antemano:
1. Check bo boto, motor y ekiponan regularmente y revisa prome cu sali. Percura pa nan ta den bon condicion pa bo por conta ariba nan riba lama.
2. Check condicionnan di tempo. Check cu meteo of otro canalnan informativo cu ta duna perdicion di condicion di lama y tempo. Check cu amigonan piscado cu por sa di informacion al caso y recien. Tuma un decision sakseno y conservativo unda ta pone siguridad prome.
3. Check pa bo tin bo pakete di siguridad. Nos lo amplia despues den otro articulonan riba kico tur por of mester tin den un pakete di siguridad abordo. Un pakete di siguridad ta ekiponan di emergencia y prome auxilio. Salbabida, luz, first aid kit, awa extra, ta djis algun cos cu ta menciona aworaki.
4. Check cu bo famia of red di emergencia. Bo famia of sernan keri ta e promenan cu mester bati alarma y activa e red di sosten, pero si nan no sa ki ora bo ta bin tera of unda bo ta bay pisca, ta haci e trabou di rescate mas dificil. Check pa nan tin e informacion necesario. Ki ora bo ta bin aden? Si no sa esaki, ta con nan por bati alarma na tempo? Check pa nan tin informacion unda bo ta of ta bay pisca. Check pa nan tin informacion di boto y kico tin abordo. Check pa famia sa, unda pa bati alarma y ken tur yama. Nos lo profundisa riba tur esakinan den futuro articulo tambe.
2. Durante biahe pa lama:
1. Sea atento semper di tur cos rond di bo. Lama ta rondona cu peliger. Sea consciente, atento y responsabel tur momento. Pa esunnan cu ta keda na tera, keda pendiente di ora y telefon (pa bati alarma si no ta na tera na ora palabra).
2. Percura pa bo sa unda tur bo ekiponan ta, pa asina den pura por yega na nan cu tempo suficiente.
3. Notifica tempran y ta miho bati alarma ora bo ta den duda cu tarda demasiado y haci e problema mas grandi. Miho establece un liña di contacto momento cu ta sospecha un problema.
3. Den emergencia:
1. Bati alarma y notifica autoridad. 913 ta number di Kustwacht pa emergencia. Canal 16 riba radio vhf. Duna mas hopi informacion cu bo por. Describi e situacion. Bisa e posicion (unda) mas exacto cu bo por. Bisa cuanto hende abordo y ki ekipo tin. Mas informacion autoridad tin, mas miho e operacion di rescate ta bay. E punto aki ta varia pa esunnan den boto y esunnan na tera y lo keda amplia den futuro articulo.
2. Sigui instruccion di autoridad. Unabes bati alarma ta hopi importante pa keda den contacto cu autoridad y sigui loke nan ta bisa bo pa asina no bin bruhamento na e momentonan di angustia. Cada caso ta diferente y autoridad tin su proceduranan pa atende cu ne den e casonan asina.
Cada un di e puntonan aki por keda amplia masha hopi mes. E articulo aki no tin espacio pa esey. LVV kier djis recorda bo di bo rol, tanto como piscado of como famia di piscado, pa bo hiba e pensamento y discusion pa prepara, train e si ta necesario, pa un caso cu nos no kier pasa nunca, claro. Bo mester tin un plan si cla, den caso di lo pio. Pero si abo mes, no tuma paso pa esaki, nos tur ta paga e prijs halto.
Profundisa bo mes riba e diferente aspectonan di bo plan:
Mas bo pensa riba dje, mas detaye bo hinca aden, mas miho prepara bo lo ta. Ta intencion pa periodicamente LVV lo saca mas informacion pa conscientisa e piscadonan, pero si ta desea mas informacion prome cu esey por referi na diferente fuente online of por manda pregunta of comentario na [email protected].
