Dia 5 di october hues a duna su veredicto riba e situacion entre e werksternan y SKOA. A duna e trahadonan di limpiesa nan rason y e sindicato SEPPA ta haya cu e decision aki ta uno bastante husto.
Magaly Brito, secretario di SEPPA, a indica cu ta mustra claramente c’un dunado di trabou no por yega riba su mes y impone medida sin cu tabatin palabracion of evaluacion husto hunto cu trahado di henter e situacion, y pa yega na un acuerdo. Den e veredicto aki hues a indica di tene cuenta cu situacion di SKOA, esta e situacion financiero, unda ta evalua prome e cortamento cu a tuma luga y kico esaki ta significa p’e trahadonan di limpiesa den su totalidad. Den cuadro di esey, e ta evalua kico ta husto p’e situacion di SKOA.
Na final a bisa cu por a haci un versobering y a indica cu e salario por baha cu cinco porciento, pero tambe e premies cu cinco porciento. Pero no por kita tur cos, no por kita nan derechonan cu nan tabatin. SEPPA a manda informa SKOA via abogado, cu nan kier sa si SKOA ta bay aplica henter veredicto pa tur trahado di limpiesa. Pero tambe nan kier a haya un contesta diabierna, 7 di october. Si esey no ta e caso, cada un trahado di limpiesa lo entama un caso contra SKOA, pa loke nan a haci desde prome di augustus.
Segun Brito, si SKOA ta dispuesto di aplica esey pa tur trahado di limpiesa, e ora ey SEPPA ta desisti dje pensamento di lanta caso pa cada un di e otro werksternan, cual ta hopi. Si kier bay e decision eynan, SEPPA tin di sali y defende e trahadonan. Di otro banda SEPPA ta spera, kico SKOA ta bay haci nan no sa, cu sano huicio ta prevalece. Pa hopi aña e trahadonan aki a brinda bon servicio na e fundacion y e salario no ta asina halto, cu nan ta esun cu ta bay kibra e fundacion. Den caso cu nan nenga cu sano huicio prevalece, y minister bisa laga tur cos te eynan, y mira con por sigui hunto. Pero tambe teniendo na cuenta con SKOA tambe tin di bay na gobierno pa mustra e resultado aki.
SEPPA ta spera cu gobierno di su banda sa di respeta esaki tambe, e ora ey pone tur placa disponibel pa asina SKOA por sigui cumpli realmente cu tur su trahadonan di limpiesa. “Es mas, pakico no. Gobierno mira cu ya e cinco porciento akinan nan ta sigui kita fo’i e trahadonan, a pesar cu un hues a dicta cu esey lo por ta husto, of esey ta rasonabel, e ora ey pa gobierno bisa laga tur cos sigui normal y nan sigui cubri salario di trahado, di otro premies manera ta bin ta sosodiendo awor akinan”, el a indica.
