Ministerio di Asuntonan Social y Labor hunto cu Departamento di Labor y Investigacion (DAO) a anuncia aumento di salario minimo y e limite di salario pa aplicacion di e Ordenansa Laboral 2013 entrante mañan dia 1 di mei 2019. Ta trata aki di un aumento mensual di 51 florin pa luna, cu ta para pa 3% di aumento.
E suma di salario minimo pa un empleado cu tin 18 aña di edad of mas ta wordo ahusta entrante 1 di mei 2019 for di Awg. 1.711,15 pa Awg. 1.762,48,00 pa luna (un aumento di Awg 51,33) of Awg. 411,07 pa siman. Pa un empleado di 18 aña of mas cu ta haci trabou domestico den un residencia priva, e salario minimo ta bira Awg. 822,25 pa luna. Pa e empleado domestico cu ta traha 22 ora of menos pa siman e suma di salario minimo lo bira Awg. 9,17 pa ora.
Como consecuencia di e ahustacion di e salario minimo e limite di salario pa aplicacion di e Ordenansa Laboral 2013 (Arbeidsverordening 2013) tambe lo subi entrante 1 mei 2019. E Ordenansa Laboral 2013 ta e ley cu ta regla condicionnan di trabou manera entre otro e oranan maximo cu por traha pa dia of pa siman, dianan di sosiego, pago di overtime y pago riba dianan di fiesta.
E Ordenansa Laboral no ta aplicabel pa tur trahado pero ta conta solamente pa trahadonan cu ta cay bou di e limite di salario.
E limite di salario nobo lo bira entrante 1 mei 2019, e salario minimo (Awg. 1.762,48) x factor 2.5= Awg. 4.406,20. Esaki ta encera cu trahadonan cu ta gana un salario di Awg. 4.406,20 pa luna of Awg. 52.874,40 pa aña of menos, ta cay bou di proteccion di e Ordenansa Laboral 2013 y tin derecho riba tur e condicionnan di trabou stipula den e ley aki.
Opinion di comercio:
Tanto Camara di Comercio como ATIA ta keto ainda riba e decision aki. Ambos a laga sa cu despues di e dia liber nan lo expresa nan opinion. Un fuente den Camara di Comercio a bisa nos cu pa nan e decision aki a bin di sorpresa. A reuni dialuna y ningun momento a bisa cu diamars lo anuncia aumento general asina. Nan tambe lo mester reuni pa fiha nan posicion e siman aki ainda, aunke nan ta duda cu Gobierno lo cambia di decision. E problema ta cu normalmente ta ahusta salario minimo dia 1 di januari y cu anticipacion pa comercio por hink’e den nan presupuesto. Awor a opta pa adapt’e asina sin mas memey di aña sin cu comercio por a anticipa e gasto extra aki. Pues sin ningun duda lo mester bin aumento di prijs pa absorba e aumento aki.
