Diasabra anochi ta tuma luga e di dos buelta di Copa ABC, unda cu S.V. Dakota a representa Aruba na Corsou. S.V. Dakota a enfrenta e campeon Jong Holland. E wega a termina na fabor di hermana isla di Corsou 3-2.
E campeon di Aruba, esta S.V. Dakota, a hunga na Corsou buscando pa bay cu e victoria, pero a perde e wega den ultimo minuut. Na comienso ambos team a subi tereno cu e meta pa bay cu e victoria, unda cu Jong Holland a habri e mercado na 18 minuut di wega cu gol di Gersinio Constansia. E wega a continua fuerte y na 34 minuut di wega Fernando de Sousa a anota e prome gol pa S.V. Dakota.
Den e di dos tempo Keano Maduro a pone S.V. Dakota dilanti anotando e di dos gol na 71 minuut di wega. E wega a continua unda cu Jong Holland a busca pa tabla e wega y a logra esaki na 79 minuut cu gol un biaha mas di Gersinio Constansia. Ambos team a sigui busca pa anota gol pero no a logra esaki y na final wega a termina 2-2.
A bay extra tempo unda cu den e prome 15 minuut gol no a cay pa niun di dos team. Jong Holland a haya un oportunidad y na 117 minuut di wega Ruensley Leuteria a desempata e wega. Jong Holland a bay cu e victoria.
Na Boneiro Real Rincon a gana su wega contra di S.V. Vesta cu e score di 4-2. E golnan anota pa Real Rincon tabata Ayrton Cicilia na 24 minuut di wega, Fabio Hierck na di 47 minuut, Jairo Clarenda na di 74 y 90 minuut. Pa S.V. Vesta e golnan anota tabata di Reylison Otto na di 45 minuut y Ruchendro Kierindongo na 51 minuut di wega.
E final di Copa ABC lo ta diasabra 29 di September na Boneiro entre Real Rincon y Jong Holland. Ambos team ta buscando pa bira e prome campeon di Copa ABC despues di 30 aña. Arubaanse Voetbal Bond (AVB) ta gradici tur hende cu a haci e campeonato uno realidad.
