Premier mr. Evelyn Wever-Croes a topa na New York cu Presidente di Panama, esta Juan Carlos Varela. E encuentro tabata durante e “High level meeting” relaciona cu e crisis migratorio di Venezuela. Mescos cu Aruba, na Panama tambe nan ta confrontando un crisis di cantidad di Venezolano purbando pa establece den e pais, pa biba y pa traha.
Manera ta conoci, Prome Minister di Aruba ta atendiendo e di 73 sesion di e Asamblea Nacional (UNGA 73) di Nacionnan Uni, cu a cuminsa desde dia 18 di September 2018. Awe diamars tabata e prome dia di e debate general na nivel halto y lo sigui pa 9 dia. Tema di e debate general e aña aki ta ‘Making the United Nations Relevant to All People: Global Leadership and Shared Responsibilities for Peaceful, Equitable and Sustainable Societies.’
A enfoca riba 7 tema di mas prioridad durante e sesionnan:
- Promove igualdad di sexo
- Promove y implementa maneho global nobo relaciona cu migracion y regugiadonan
- Enfoca pensamento innovativo riba futuro di trabou
- Esfuersonan pa protega medio ambiente, particularmente polucion cu plastic
- Mas conscientisacion pa hendenan cu disabilidad
- Implemente e reforma di e sistema di Nacionnan Uni y promove paz.
Separa di Prome Minister Wever-Croes, tambe a biaha Minister di Husticia Andin Bikker pa e mesun evento ey.
