Despues di completa su estudio na Hulanda, Nathaly de Cuba ta prepara pa sigui desaroya su experiencia den e mundo di consultancy y entrepreneurship. Cu un pasion pa yuda empresanan crece, traha strategia y desaroya idea innovativo, e hoben Arubiano ta mira e experiencia internacional como un oportunidad pa amplia su conocemento y traha riba su propio negoshi.
De Cuba a conta cu ora e a yega Hulanda, e no tabata sa exactamente kico e kier a studia ni den cua direccion e kier a bay. Finalmente, el a scoge e estudio HBO “International Creative Business”, un experiencia cu a yuda e descubri su interes den mundo empresarial.
Despues, e a sigui un master den Consultancy and Entrepreneurship. Durante e estudio, e a descubri cu consultancy ta e area den cual e kier sigui desaroya su carera.
“Mi tin un pasion pa yuda hende den nan propio negoshi, yuda nan cu strategia y planificacion. Si bo tin un idea pero bo no sa con pa sigui cu ne, esey ta e tipo di trabou cu mi gusta haci”, de Cuba a splica.
Experiencia internacional a amplia su vision
Durante su estudio, de Cuba a traha cu cliente di diferente parti di mundo, entre otro di Indonesia, New Zealand, Mexico, Aruba y Hulanda. E experiencia aki a duna e oportunidad pa siña traha cu hende di diferente cultura y comprende con cada mercado tin su propio manera di pensa y opera.
Un otro experiencia importante pa dje tabata su tesis, cu tabata enfoca riba un agencia di biahe. Un amiga di dje a duna e oportunidad pa studia e negoshi y analisa su desaroyo.
De Cuba a splica cu e a yega Hulanda cu e idea pa studia y biaha, pero e pandemia di COVID-19 a limita su posibilidad pa explora e pais y socialisa. Sin embargo, e proyecto di tesis a habri porta pa experiencia nobo, incluyendo un biahe pa Peru hunto cu e grupo di biahe di e agencia.
E experiencia aki a yuda e clarifica su propio meta: establece un negoshi di creative consultancy, cu lo ofrece apoyo den marketing, strategia, planificacion y desaroyo di idea innovativo pa empresanan.
Pa mas lesa TREMPAN.COM.
