Lider di fraccion di FUTURO, Muzaninn Wever, ta insisti cu mester sigui dialoga y haci mas investigacion prome cu tuma decision riba e aumento di sueldo minimo. Segun Wever, e medida por tin consecuencia pa comercio y economia di Aruba, y p’e motibo ey e ta considera importante pa analisa e asunto bon.
Wever a duna su reaccion ora prensa a puntra dje tocante na e declaracion di Minister Presidente, kende a expresa su deseo pa introduci e aumento di sueldo minimo mas lihe.
Wever a recorda cu FUTURO y AVP a fiha tres prioridad den nan acuerdo di gobernacion: mehora poder di compra di pueblo, baha e gastonan pa empresanan opera y promove dialogo social.
“Mi ta kere cu ora nos ta pensa con nos ta bay dilanti, nos tin cu corda kico nos a acorda entre FUTURO y AVP”, Wever a bisa. E ta kere cu mester cana riba e caminda ey pa por yega na un solucion.
Comercio kier mas investigacion
Wever a conta cu durante un reunion di e comision di Asuntonan Economico, representante di sector comercial a expresa nan preocupacion tocante na e plan pa introduci e aumento di sueldo minimo riba un plaso asina cortico.
Segun Wever, e representantenan di comercio kier mas investigacion pa compronde miho cua lo ta e consecuencia pa empresanan, economia di Aruba y e gastonan general di pais.
E preocupacionnan aki ta coincidi cu esnan cu e mes tin riba e tema. Pa Wever, no ta solamente un cuestion di aumenta sueldo, sino tambe di compronde con e medida lo afecta e economia y e sector comercial.
Pasobra e reunion di comision tabata cera, Wever no a duna detaye di tur loke a discuti. Sin embargo, el a confirma cu e empresarionan a comparti nan preocupacionnan durante e encuentro.
Pa mas lesa TREMPAN.COM.
