Aruba Food & Beverage Association (AF&BA) ta prepara pa bin cu un Job Fair virtual, cu lo conecta personanan cu ta buscando trabao cu empresanan cu tin vacante disponibel na Aruba.
Miriam Dabian, CEO di AF&BA, a splica cu lo lansa e plataforma jobfairaruba.com dia 22 di october, mientras cu registracion pa solicita cita cu empresanan lo cuminsa dia 5 di november.
E sistema ta permiti participantenan registra nan datonan personal y, si nan desea, subi nan curriculum vitae (CV). Despues di registracion, nan lo ricibi un e-mail cu acceso n’e feria virtual.
Dentro di e plataforma, participantenan por bishita standnan digital, explora vacantenan y identifica oportunidadnan cu ta coresponde cu nan interes profesional.
E entrevistannan ta programa entre 9:00 AM y 5:00 PM, den blokenan di 20 minuut. Cada entrevista ta dura aproximadamente 15 minuut. Dabian a indica cu e feria tambe lo ofrece informacion educativo y profesional. Universidad di Aruba y EPI lo ta disponibel pa orienta personanan interesa den sigui studia of desaroya nan capacidadnan.
DIMAS tambe lo participa pa brinda informacion tocante permisonan di trabao. Interesadonan por solicita cita di dies minuut pa ricibi orientacion. AF&BA lo ofrece apoyo na personanan cu no tin computer, celular of internet, pa nan tambe por participa. Segun Dabian, e iniciativa ta busca facilita reclutamento y duna mas oportunidad na comunidad.
Personanan cu no logra reserva cita por drenta e feria durante e actividad y verifica disponibilidad na standnan virtual. Un indicador berde lo mustra ora tin espacio liber pa entrevista. E plataforma ta combina empleo, educacion y orientacion den un ambiente digital accesibel pa tur interesado.
Pa mas informacion lesa TREMPAN.
