Instituto Medico San Nicolas (ImSan) a fortalece su servicio di emergencia cu incorporacion di dos ambulance nobo, cu lo contribui na miho atencion medico y siguridad di pashent na Aruba.
Director interino di ImSan, Liberato Hoek, a splica cu e vehiculonan ta parti di un plan di reemplaso, considerando cu bida util di un ambulance ta aproximadamente seis aña. E meta ta evita problema mecanico, gastonan halto di mantencion y interupcion di servicio. Hoek a aclaria cu e ambulancenan ta completamente nobo, directamente fo’i fabrica di Ford, y ta cumpli cu standard di siguridad Triple K.
Un di e ambulancenan tin colo lavander, simbolo di conscientisacion tocante tur tipo di cancer, mientras cu anteriormente tabatin un ambulance ros relaciona cu cancer di pecho. Cada ambulance ta opera cu un chauffeur y un enfermero. Actualmente, seis nurse adicional ta den formacion y ta proyecta termina nan estudio na final di november.
Director di AZV, ir. Edwin Jacobs, tambe a forma parti di e presentacion, caminda colaboracion entre AZV y ImSan a haya reconocemento pa realisacion di e proyecto.
Minister di Salubridad, drs. Mervin Wyatt-Ras, a felicita ImSan, AZV y personal di ambulance p’e logro. El a destaca cu e vehiculonan tin aparato medico pa ofrece asistencia inmediato, incluyendo control di presion arterial y suministro di oxigeno. E proyecto a tuma aproximadamente dos aña pa realisa. Minister a reafirma compromiso di Gobierno pa sigui fortalece servicio di salud accesibel, pagabel y di calidad, garantisando cu pueblo di Aruba por conta cu atencion medico apropia durante emergencia.
Pa mas detaye lesa TREMPAN.
